На Твитер се шири дезинформација дека рудниците во Радовиш се затвараат поради високите цени на струјата. Оваа дезинформација ја објави твитер налогот Раинконен, и има 70 споделувања, над 250 допаѓања и десетина коментари. Помеѓу споделувачите на оваа дезинформација е и членот на ВМРО-ДПМНЕ, Илија Димовски.
Оваа дезинформација оркестрирано се шири од Твитер профили кои се поддржувачи на опозицијата. Најголемиот дел од коментарите се за добивање на политички поени, или ширење на етничка нетрпеливост. Ви пренесуваме дел од коментарите кои се напишани при споделување на дезинформацијата:
„Таа е агендата на калето и стратешките (не) пријатели“. „Жално… Што чекаме народе!?“. „Гајле му е на нашите власти (читај Албанците) за Радовиш, радовишани и било која друга мк фирма. Битно нивните бизниси да цветаат, ама толку се глупи што не сфаќаат дека кога цел тој народ ќе остане без работа и плата к*р ќе се купува и тргува. Ама пак тие си се нафатирани!“. „СДССМ треба занавек да се забрани, да непостои!“, „Дојде живот со Таче Ќурката“…
Вистината е дека од 1 септември годинава рудниците Бучим и Боров Дол ќе прекинат со процесот на производство на определен период во кој е планирано да се направи целосна замена на флотомашините во рудникот Бучим со нова опрема, која што е дизајнирана и изработена од светски реномираната компанија Метсо Оутотек, и да се изгради фотонапонска централа за производство на електрична енергија, со што ќе се постигне намалување на зависноста од цената на електричната енергија на отворениот пазар.
– Проектот за модернизација започна да се реализира уште од септември 2021 година, притоа, во наредниот период се очекува испораката на опремата, велат од компанијата и нагласуваат дека уште од јануари годинава започнале со активности за изградба на фотонапонска централа.
Во текот на привремениот прекин со производство, од раководството посочуваат дека вработените ќе бидат платени согласно законските прописи, при што дел од вработените ќе бидат задолжени за тековното одржување на опремата, а во текот на инвестициските зафати, вработените ќе бидат дополнително ангажирани зависно од потребата.
ЦМТ
