- Зеленски го нагласи чувството на единство во земјата во контраст со стравот за кој рече дека се чувствува во Русија.
- Според воените извештаи, Русите извршиле 51 воздушен напад, вклучително и 44 напади со иранските дронови. Сите дронови се соборени.
- Русите извршија ракетен напад врз детската болница во Херсон, јавуваат украински воени извори.
- Мета на нападите беше и главниот град Кијив.
Украинскиот претседател Володимир Зеленски го искористи своето прво обраќање оваа година за да го нагласи чувството на единство во земјата во контраст со стравот за кој рече дека се чувствува во Русија.
„Нашето чувство за единство, автентичност, самиот живот – сето ова е во драматичен контраст со стравот што преовладува во Русија“, рече Зеленски во обраќањето објавено во недела навечер, на 1 јануари.
„Тие се плашат. Можете да го почувствувате тоа. И тие се во право што се плашат. Затоа што губат. Дроновите, проектилите, ништо нема да им помогне. Затоа што ние сме заедно. А тие се заедно само во стравот“.
Зеленски им честиташе на украинските сили за соборувањето на 45 дронови Шахед-136 од иранско производство, лансирани од Русија во првата ноќ од годината, пренесува CNN.
„Руските терористи се патетични и влегоа оваа година останувајќи исти. Нашите бранители беа страшни и на 1 јануари се покажаа многу добро“, рече тој.
Зеленски им се заблагодари на „сите што се борат со непријателот на линијата на фронтот, секој ден и секоја ноќ“, како и на работниците во енергетиката и комуналните претпријатија кои ја обновуваат инфраструктурата оштетена од руските напади.
„И многу е важно како сите Украинци ја наполнија својата внатрешна енергија оваа новогодишна ноќ“ – рече Зеленски – „и како им се заблагодаривме на нашите воини. Како им се заблагодаривме на нашите најблиски. Колку милиони пати низ цела Украина, низ целиот слободен свет, нашата желба – желбата за победа – звучела и сè уште звучи“.
Најнови вести од фронтовите во Украина
Во текот на изминатото деноноќие, 1 јануари, 313-ти ден од почетокот на руската целосна агресија, според оперативното ажурирање од украинските воени извори, „непријателот изврши 51 воздушен напад, вклучително и 44 напади со иранските дронови Шахед-136.“ Мета на нападите беше и главниот град Кијив.
Според истиот извор, сите 44 дронови беа соборени од единици на одбранбените сили на Украина.
„Непријателот изврши и 55 напади со ракетни системи, вклучително и врз детската болница во градот Херсон“ – се вели во извештајот.
Со повеќе детали за воздушните напади врз Херсон, се јави Јарослав Јанушевич, шеф на Регионалната воена управа во областа, во објава на Телеграм, пренесува Укринформ.
„Руските напаѓачи 71 пати ја гранатираа територијата на Херсонската област. Непријателот ги нападна мирните населби во регионот со артилерија, MLRS, минофрлачи и тенкови“, напиша Јанушевич.
И во текот на новогодишната ноќ руските агресори не мируваа. Тие извршија силни напади со ракетни системи и дронови низ цела Украина, како и неколку неуспешни копнени напади на девет сектори од фронтот.
Генералштабот на вооружените сили на Украина преку објава на Фејсбук соопшти дека украинските сили веќе убиле 107.440 руски војници во Украина во периодот од 24 февруари 2022 година до 2 јануари 2023 година, вклучувајќи 720 само во изминатиот ден. Оваа информација не е потврдена од независен извор.
ЦивилМедиа Деск
