Врховниот командант на вооружените сили на Украина Валериј Залужњи и командантот на оперативната и стратешка група трупи Хортица, Олександр Сирскиј, рекоа дека одбранбената операција и натамошното зајакнување на позициите во Бахмут мора да се продолжи.
Тие го изјавија ова на редовниот состанок на штабот на врховниот командант, што во понеделникот го одржа претседателот на Украина Володимир Зеленски, пренесува Укринформ повикувајќи се на прес-службата на претседателот.
На средбата командантите на оперативните и стратешките групи трупи известија за состојбата на главните правци на фронтот. Членовите на Штабот подетално ја разгледаа ситуацијата во Бахмут.
Оценувајќи го текот на одбранбената операција, претседателот ги прашал врховниот командант на вооружените сили на Украина Валериј Залужњи и командантот на оперативната и стратешката група трупи Хортица Олександр Сирскиј за понатамошни дејства во насока Бахмут. Тие се изјаснија за продолжување на одбранбената операција и дополнително зајакнување на нашите позиции во Бахмут.
На состанокот присуствуваа и шефот на претседателскиот кабинет Андриј Јермак, началникот на Главната разузнавачка управа Кирило Буданов, премиерот на Украина Денис Шмихал, секретарот на Советот за национална безбедност и одбрана Олексеј Данилов и команданти на трупите и оперативните насоки. На состанокот се приклучија и членови на Владата, раководители на безбедносните и органите на редот.
Како што пренесува Укринформ, Серхиј Черевати, портпарол на Источната група на вооружените сили на Украина, изјави дека украинските сили во Бахмут продолжуваат да ја држат одбраната.
Подготви: Д. Мишев
