Дозволете ми на самиот почеток да ве поздравам и со порака за обединување околу вистинските европски вредности, како единствен предуслов за иднината, да ви го честитам Денот на победата на фашизмот и Денот на Европа, рече во своето обраќање вицепремиерот за европски прашања Бојан Маричиќ, по повод одбележувањето на значајните денови.
-Денеска ги славиме храброста, мирот, помирувањето, обединувањето и стабилноста. Славејќи го Денот на победата гордо се сеќаваме на македонската антифашистичка историја и антифашистичката борба, како една од најголемите вредности на Северна Македонија. Гордо се сеќаваме и оддаваме почит на борците кои ги бранеа своите држави и светот од најголемото зло на минатиот век-фашизмот. Нивното дело нè обврзува на останеме на страната на европските и вистински вредности, негувајќи ја слободата, толеранцијата, демократијата и дијалогот. Тоа нè држи во блиски односи со нашите европски партнери и стратешки сојузници, со кои заедно прославуваме и потврдуваме дека европскиот пат на Северна Македонија е најдобриот начин за зачувување на оние вредности кои секогаш нè ставале на страната на правдата и победата. За жал и овогодишниот 9-ти Мај го дочекавме во услови на безбедносна и економска криза, со нужност за солидарност, единство и соработка, како најдобар одговор за зајакнување и заштита на слободата, мирот и напредокот на Европа, кажа Маричиќ.
Тој додаде дека историјата нè потсетува дека европскиот проект е создаден во тешки околности, после пустошот кој го оставила војната во Европа, благодарение на основачите кои биле убедени дека соработката е подобра од конфликтот, дека компромисите се сила, а не слабост и дека помирувањето е влог во иднината.
-Тоа е она што денес, после повеќе од 7 децении ни е и нам потребно. Со лидерство и храброст, да си подадеме рака за теми и прашања кои им значат на граѓаните, како мирот, стабилноста, демократијата, социјалниот и економски развој. Оваа година го одбележуваме Денот на Европа како земја која преговара со ЕУ и имаме добра основа и право да сме мотивирани за да продолжиме понатаму и со надминување на предизвиците, да дадеме шанса 2030 да биде реалност за Северна Македонија. За интеграцијата во ЕУ не зборуваме само ние политичарите или администрацијата – тоа е нешто што македонските граѓани веќе можат да го почувствуваат и видат, преку европските проекти. Досегашните успеси јасно покажуваат дека нашата земја е на вистинскиот пат, на патот на демократските реформи, економската стабилност и европската иднина. Тоа бараат граѓаните, реформи, европски средства и подобар квалитет на живот, а тоа побрзо ќе го постигнеме преку процесот на преговори и членството во ЕУ. Наше е да останеме на овој пат, да ја реализираме идејата на нашите предци и да им ја пренесеме на нашите потомци. Да создаваме, напредуваме, да прифаќаме европски стандарди и да ги живееме европските вредности. Европа припаѓа на регионот и регионот припаѓа на Европа, заклучи вицепремиерот.
ЦМТ
