„ВМРО-ДПМНЕ ќе го почитува Преспанскиот договор, мора да го почитуваат Уставот како една од најголемите партии во земјата. Без разлика дали ќе останат во опозиција или ќе дојдат на власт, мора да го почитуваат. Дури и лидерот на ВМРО-ДПМНЕ, Христијан Мицкоски јавно кажа дека нема назад од тоа“, рече поранешниот премиер Зоран Заев во интервју за грчкиот весник „Катимерини“.
Тој додаде дека и грчката опозиција во времето кога се потпишуваше договорот, а сегашна власт нашла начини како да се продолжи соработката меѓу двете држави.
„Треба да се забележи дека по Преспанскиот договор ситуацијата во регионот се менува. Се позабележлива е соработката со повеќе од 2,5 милијарди евра инвестиции од Грција во Северна Македонија. Тоа е 25 отсто од нашиот БДП“, рече Заев.
Експремиерот додаде дека е благодарен што грчката Влада предводена од Мицотакис се бореше за Северна Македонија да ги започне преговорите со Европската Унија.
„За тоа служат пријателите и ние сме навистина благодарни за тоа, граѓаните го ценат тоа“ рече Заев.
Тој додава дека граѓаните ги видоа бенефитите од Преспанскиот договор. Двете земји сега имаат значително зголемена соработка, особено во енергетскиот сектор.
„Сега сè е отворено и имаме многу повеќе инвестиции од Грција во Северна Македонија“ изјави поранешниот премиер Заев.
Тој додаде дека и во периодот на корона-кризата, Грција беше тука да ни помогне со вакцините, а сега се гради заеднички енергетски пазар.
„Со заедничкиот енергетски пазар ќе бидеме поиздржливи и поподготвени за идните енергетски кризи. Ние сме мал регион и ако работиме заедно ќе бидеме посилни“ рече Заев.
