Речиси 61.000 луѓе веројатно починале во Европа минатото лето како последица на екстремно високите температури, покажуваат резултатите од новото истражување што сугерира дека напорите на европските земји да се подготват за екстремни горештини толку многу се неуспешни што завршуваат како фатални, пишува Гардијан.
Студијата на научници од неколку европски здравствени институти укажува дека повеќе од 61.600 жители починале од последици поврзани со топлината во 35 европски земји од крајот на мај до почетокот на септември 2022 година за време на најжешкото лето досега забележано во Европа.
Студијата, чии резултати беа објавени денеска во списанието Nature Medicine, открива дека медитеранските земји, како Грција, Италија, Португалија и Шпанија, забележале највисока стапка на смртност во однос на бројот на жители.
Медитеранот е под влијание на процесот на дезертификација, па топлотните бранови во текот на летните месеци се засилуваат токму поради вакви сушни услови, вели коавторката на студијата, Џоан Балестер, професорка на Институтот за глобално здравје во Барселона.
Во текот на минатото лето, кога европските земји беа зафатени од бројни и интензивни шумски пожари и големи суши, во јули Португалија забележа највисока температура од 47 степени Целзиусови, што е нешто помалку од најжешката температура забележана во таа земја, која изнесуваше 47,3 степени во 2003 година. Во апсолутни бројки, најмногу смртни случаи поради горештините и топлотните бранови се регистрирани во Италија (18.010), Шпанија (11.324) и Германија (8.173).
Имајќи предвид дека климатските промени предизвикани од човековата активност ги зголемуваат температурите, топлотните бранови стануваат се почести и поинтензивни. Екстремно високите летни температури може да бидат фатални бидејќи често предизвикуваат топлотен удар или ги влошуваат постоечките кардиоваскуларни и респираторни заболувања, а меѓу најранливите се повозрасните лица.
Г. Т.
