Вицепремиерот задолжен за европски прашања, Бојан Маричиќ, во Вашингтон во екскузивно интервју за Гласот на Америка се осврнува за најгорливиот предизвик за Северна Македонија околу уставните измени и патот кон ЕУ.
Глас на Америка: Вицепремиере, вие сте препознатливиот виш функционер во сферата на евроинтеграции за јавноста, процес кој де-факто може да остане блокиран, ако до крајот на годината не успее процесот на уставни измени. Која е пораката од средбата со вишиот претставник на Стејт департментот, Габриел Ескобар?
Маричиќ: Пораката е дека постои моментум за Западен Балкан, вклучувајќи ја и Северна Македонија кон европските интеграции заедно и поврзано со ситуацијата во Укриина. Таа шанса не смее да ја пропуштиме, втора шанса не знаеме кога ќе имаме, нема да има можност повторно да се разговара и преговара за истите прашања кои што ги решивме минатото лето со Бугарија во форма на францускиот предлог. Не е време за политиканство, за вонредни избори, не е време за партиски препукувања. Време е секоја партија и секој пратеник и политичар да покаже на дело дека е за исполнување на нашите стратешки приоритети, во овој случај, зачленувањето во ЕУ.
Глас на Америка: Меѓутоа, впечатокот е дека повеќе време трошите во убедување на опозицијата во Скопје, отколку на разговори во Брисел во ЕУ?
Маричиќ: Јас во последно време сум повеќе во Скопје, но има наши тимови во Брисел кои што го водат скринингот многу успешно. Во Скопје имаме обврска да ги туркаме и реформските процеси и да го вратиме Собранието да функционира како една важна институција и да работиме на обновување на оној консензус за ЕУ. Сите чувствуваме дека консензусот за ЕУ е нарушен, откако ВМРО-ДПМНЕ зазема премногу цврст став да не ги поддржува уставните измени. Не можеме да бидеме само декларативно за ЕУ, мора да покажеме на дело. Денес се уставните измени, а утре ќе бидат многу други одлуки за кои ќе треба двотретинско мнозинство, а се врзани за конкретни европски политики, независно дали се работи за правосудството или други сегменти.
Глас на Америка: Безмалку е извесно дека ВМРО-ДПМНЕ нема да се помести од своите позиции. Во таква ситуација, кој е планот Б? Дали можеби, меѓудругото сте и овде во Вашингтон, за да побарате поддршка од стратешкиот сојузник, САД?
Маричиќ: Поддршката од стратешкиот сојузник ја имаме, но не за никаков план Б. Поддршка од сите доаѓа, но само за планот А. Тоа е единствениот план што го имаме, а тоа е завршување на уставните измени, продолжување на преговорите со ЕУ, и членство на Северна Македонија до 2030-та. Секоја партија, секој политичар, којшто ќе се спротивстави на ова, ќе носи историска одговорност, за евентуален негов неуспех. Јас сум сигурен дека имаме доволно време до ноември, да ја убедиме целата пратеничка група или дел од пратеничката група на опозицијата да гласа за овој предлог, затоа што премногу е голем влогот да ја изгубиме оваа шанса. И пратениците на ВМРО-ДПМНЕ и партијата треба да дадат одговор, зошто работат да ја пропуштиме оваа шанса, бидејќи следната година веќе ќе имаме друг контекст, а ние многу ќе доцниме. Веќе чекавме 17 години да ги почнеме разговорите, нема веќе ниту ден за губење.
📢“After 17 years of waiting, we’ve begun the dialogue with the #EU, taking a historic step towards our goal of full 🇪🇺 membership by 2030.”
– 🇲🇰 Dep. PM for EU Affairs @Bojan_Maricikj will host the Session-“EU Enlargement in the Transforming Geopolitical Dynamics” pic.twitter.com/Szi8yGxkaK— Prespa Forum Dialogue (@PrespaForum) June 8, 2023
Глас на Америка: Вицепремиере, борбата против корупцијата во Западен Балкан е главен приоритет на администрацијата на Бајден, а Стејт департментот објави дека САД ќе продолжат да поддржуваат влади, партнери од граѓанското општество, независни медиуми против организираниот криминал и искоренување на корупцијата. Меѓутоа, дали корупцијата во Македонија е закана за нејзината национална безбедност?
Маричиќ: Корупцијата е тема која што се третира во сите политики. За секое поглавје од скринингот ние дискутираме која е анти-корупциската политика во тоа поле. Таа борба против корупцијата станува хоризонтално прашање и во европските интеграции. За нашиот просперитет е важно да ја интензивираме борбата против корупцијата. Како влада направивме многу, но уште многу има да се направи. Со нашите партнери бараме решение како да се зајакне улогата не независното судство. Корупцијата е феномен каде што треба да се бориме на сите полиња. Јасно е најдобар начин е да ги продолжиме преговорите со ЕУ и да ги зајакнеме нашите капацитети во текот на преговорите.
Глас на Америка: Дали размислувате за можноста за предвремени избори, нешто, што како последно решение го нарече, лидерот на опозицијата?
Маричиќ: Предвремени избори може да има само, ако опозицијата се согласи да гласа за уставните измени и потоа да распишеме предвремени избори. Само тоа е опција што како Влада би прифатиле. Мислам дека не е време за предвремени избори, туку е време за понесување одговорност и имплементација на нашите обврски. Граѓаните ќе ни бидат благодарни доколку ја завршиме обврската пред изборите, за да не бидат изборите оптоварени, за тоа кој е ЗА а кој е Против уставните измени, затоа што тоа ќе не внесе во нов 10-годишен тунел, од кој не знаеме дали ќе може да излеземе порано од 10 години. Не е време за предвремени избори, време е за носење одлуки.
