Северна Македонија треба да ги засука ракавите и да работи на пристап што ги вклучува сите партии бидејќи влезот во ЕУ бара консензус од сите луѓе и од сите политички сили.
Пораката која што ЕУ-членките ја праќаа од 2013 година, по зачленувањето на Хрватска е „почекајте, почекајте“, сега пораката треба да биде „движете се побрзо и ќе станете дел од ЕУ.“ По војната во Украина, ЕУ сега нема друга опција освен да се прошири, што ќе бара прилагодување од нејзина страна, бидејќи не смее да остави важни земји бескрајно да чекаат, а земјите кандидати кои се способни да си ја завршат домашната задача, како Северна Македонија, треба да можат да станат членки на ЕУ во разумно време. Од вас зависи дали ќе бидете подготвени за тоа што е можно поскоро.
Ова го порачува меѓу другото Стефано Стефанини, експерт за глобални безбедносни прашања, во интервју за МИА, што го пренесе Слободен печат.
Прашан што треба земјава да направи во овој круцијален момент за нејзината европска перспектива, Стефанини, кој има многу богато дипломатско искуство, вели „засукајте ги ракавите, постигнете политички консензус и посветете се на реформите од ЕУ-агендата“.
„Северна Македонија треба да ги засука ракавите и да работи на пристап што ги вклучува сите партии бидејќи влезот во ЕУ бара консензус од сите луѓе и од сите политички сили. Реформите понекогаш се болни и треба да ја имате целата земја зад себе. Тоа е она што Северна Македонија треба да го направи, а ЕУ мора да биде јасна дека ако Северна Македонија до 2028, 2029 или која било година, ги исполни условите за членство може да влезе во Унијата. Зачленувањето мора да оди според принципот на регата, што значи дека ако ја поминете линијата, нема потреба да чекате некого“, вели италијанскиот дипломат кој е поранешен постојан претставник во НАТО и некогашен дипломатски советник на италијанскиот претседател Џорџо Наполитано, а служел и во дипломатските мисии во Њујорк, во ОН, Москва, Вашингтон и Перт.
Стефанини има силна експертиза во трансатлантските односи, безбедноста, одбранбените способности и индустријата, Русија и прашањата за ЕУ. Во моментов има и статус на советник во Брисел, како и во повеќе меѓународни тинк-тенк организации. Дел е од бордот на директори на угледната Мрежа за европско лидерство.
