Израелскиот премиер Бенјамин Нетанјаху вечерва во телевизиско обраќање до нацијата изјави дека земјата е во војна за да ја обезбеди својата егзистенција и дека злосторствата извршени од Хамас се слични на оние од времето на терористичката организација Исламска држава.
„Ние сме во војна за да ја обезбедиме нашата егзистенција, војна во која ќе победиме“, истакна Нетанјаху, оценувајќи дека „војната ја наметна ужасен непријател – ѕверови кои го слават убивањето на жени, деца и возрасни луѓе“.
„Злосторствата извршени од Хамас не се видени уште од злосторствата на Исламската држава. Деца ќе бидат егзекутирани со нивните семејства, девојчиња и момчиња застрелани в грб, убиени. Секогаш знаевме што е Хамас. Сега целиот свет знае. Хамас е Исламска држава“, рече израелскиот лидер во своето второ телевизиско обраќање од саботата, кога почна ненадејниот напад на Хамас врз Израел.
Тој најави дека Израел ќе го победи Хамас како што просветениот свет ја победи Исламската држава.
„Отсекогаш знаевме кој е Хамас. Сега целиот свет знае. Хамас е ИСИС. И ние ќе го победиме како што просветениот свет го победи ИСИС. Овој злобен непријател сакаше војна и ќе добие војна“, истакна Нетанјаху, повторувајќи дека ова е „само почеток“.
Израелскиот премиер го изјави ова откако военото крило на Хамас се закани дека ќе ги убива луѓето заробени за време на нападот на југот на Израел и одведени во Појасот Газа.
Како што синоќа неофицијално објавија палестинските екстремистички организации, има повеќе од 130 заложници, а израелската страна наведе дека меѓу нив има војници и цивили, меѓу кои и жени, деца и повозрасни лица.
Бројот на загинати во Израел од ракетирањето на Хамас од Газа и судирите што избувнаа во јужен Израел кога вооружени екстремисти ја преминаа границата, се зголеми на повеќе од 900, објавија вечерва медиумите на хебрејски јазик.
Во меѓувреме Хамас објави дека во Појасот Газа загинале 687 лица.
Илјадници луѓе се повредени од двете страни.
Г. Т.
