Сериозните прекршувања на меѓународното хуманитарно право, вклучително и воените злосторства, од сите страни во конфликтот меѓу Израел и Палестина продолжуваат со несмалено темпо.
Останува неизвесна судбината на најмалку 200 израелски заложници кои ги киднапира Хамас и други вооружени групи. Засилената израелска опсада на Газа го блокираше влезот на стоки, вклучувајќи вода, храна и гориво, оставајќи повеќе од 2 милиони луѓе во Појасот Газа во услови на преживување.
Хуманитарната катастрофа што произлегува од 16-годишната нелегална израелска блокада на окупираниот Појас Газа само ќе се влоши доколку борбите не престанат веднаш.
Од Евро-медитеранскиот монитор за човекови права соопштија дека во интензивните израелски воздушни и артилериски напади врз Појасот Газа досега се убиени 23.012 Палестинци, меѓу кои 9.077 деца. Бидејќи стотици дополнителни деца остануваат заробени под урнатините на уништените згради со мали шанси за преживување, вкупниот број на смртни случаи на деца најверојатно ќе надмине 10.000.
Меѓу првите светски организации кои повикаа на итен прекин на огнот и ги осудија двете страни за кршењето на човековите права и бруталните напади врз цивилното население, е и ЦИВИЛ- Центар за Слобода.
ЦИВИЛ – Центар за слобода како организација за човекови права упати најостра осуда за терористичкиот напад на Хамас во Израел, каде што брутално беа убиени 1.300 луѓе, меѓу кои и жени и деца, а киднапирани беа околу 200 луѓе, меѓу кои и странски државјани.
Од организацијата упатија повик за итен прекин на огнот и целосно отворање на сите патишта за хуманитарна помош за настраданото население во Појасот Газа, и упати најостра осуда и протест до израелската влада која е одговорна за неселективното бомбардирање и убивање цивили, уништување на критичната цивилна инфраструктура, егзодусот на 1,1 милион луѓе што го нареди под закана со оган, како и за целосната блокада на снабдувањето на два милиони луѓе со храна, гориво, електрична енергија, вода и лекови.
ЦИВИЛ продолжува со повикот за мир и помирување, заштита на човековите права и почитување на меѓународните договори за заштита на населението во услови на војна,
Амнести Интернешнл излезе со петиција за прекин на огнот од двете страни во конфликтот, за да се стави крај на страдањата на цивилното население.
„Прекинот на огнот ќе ги запре незаконските напади од сите страни, ќе го запре растечкиот биланс на жртви во Газа и ќе им овозможи на хуманитарните агенции да донесат спасувачка помош, вода и медицински материјали во Појасот за да се справат со неверојатните нивоа на човечко страдање. Тоа, исто така, ќе им овозможи на болниците да добијат лекови кои спасуваат животи, гориво и опрема што им е очајно потребна и да ги поправат оштетените одделенија“, порачува Амнести.
Според оваа голема меѓународна организација, прекинот на огнот, исто така, ќе обезбеди можности за преговори за ослободување на заложниците притворени во Газа и за спроведување независни меѓународни истраги за воените злосторства извршени од сите страни со цел да се стави крај на долгогодишната неказнивост, што ќе продолжи да раѓа дополнителни злосторства.
„Справувањето со основните причини за овој конфликт, со разбивање на израелскиот систем на апартхејд наметнат на Палестинците сега е поитно од кога било“, се вели во петицијата на Амнести.
Генералното собрание на Обединетите нации пред два дена со големо мнозинство ја усвои необврзувачката резолуција за Блискиот Исток со која се бара хуманитарен прекин на огнот, заштита на цивилите, како и итно и безусловно ослободување на сите заложници и хуманитарен пристап.
Резолуцијата ја поддржаа 153 земји членки, 10 гласаа „против“, а 23 беа „воздржани“. Меѓу земјите кои ја поддржаа резолуцијата за итен прекин на огнот е и Северна Македонија.
Гласањето на Генералното собрание на ОН следува откако САД на 8 декември ставија вето на слична резолуција на Советот за безбедност на Обединетите нации со која се повикува на итен прекин на огнот меѓу Израел и Хамас.
Од почетокот на конфликтот на 7 октомври, според Агенцијата на ОН за палестински бегалци (УНРВА), над 600.000 луѓе се под наредба за евакуација во јужниот дел на Појасот Газа.
ЦИВИЛ продолжува да повикува на мир и помирување, заштита на човековите права и почитување на меѓународните договори за заштита на населението во услови на војна.
Д. Тахири
