По веста за затворањето на Љупчо Палевски, осомничен дека е убиецот на 14-годишната Вања, во турскиот затвор во Бандирма, во провинцијата Баликесир, побаравме информации за таа установа.
Информациите за турските затвори се ретки, но дел од организациите за човекови права, успеваат да дојдат до информации за животот на затворската популација во овие установи. Тие извештаи говорат дека перцепцијата за „турски затвор“ е блиска до условите во реалноста.
Затворот во Бандирма, Баликесир, го има во низа извештаи на организациите за човекови права. Според извештаите, засновани на поплаки и сведоштва од затвореници и од нивните семејства, се работи за еден од затворите каде што се бележат прилично тешки услови.
Во еден извештај за состојбата во овој затвор, стои дека „болните затвореници не се носат во болница“.
Понатаму, во извештаите се наоѓаат информации и за чести претресите во ќелиите, како и претресите „до гола кожа“ во кои „детално се проверуваат сите отвори на телото“.
Затворениците немаат никаква приватност, а за најмала ситница што ќе им биде најдена при претресите, за која стражарите ќе одлучат дека не е дозволена, затворениците се казнуваат. Според извештаите, физичкото и менталното малтретирање се сосема нормално секојдневие.
Понатаму, како што откриваат извештаите до кои дојде ЦИВИЛ за затворот во кој се наоѓа Палевски, во просториите наменети за максимум десет лица престојуваат по дваесет и повеќе луѓе. Според ретките сведоштва до кои доаѓаат истражувачите на состојбите во турските затвори, храната е многу лоша, поточно, затворениците често добиваат остатоци од храна.
Според информациите од Министерството за правда, постапката за екстрадиција на Палевски би можела да трае и до неколку месеци, а скратена постапка е можна само кога лицето прифаќа да биде екстрадирано.
Судејќи по информациите за затворските услови во Турција, не е исклучено осомничениот за убиство на дете, Палевски, самиот да побара екстрадиција. Делот од јавноста кој бара казна за осомничениот убиец, може да се задоволи, барем делумно, со тоа дека тој веќе издржува прилично тешка казна.
Дежурен деск на ЦИВИЛ МЕДИА
