„Судирот во Алијанса е стар и тој судир е можеби околу едно принципиелно прашање на кое доаѓаат сите помали партии кои треба да одлучат дали да влезат во поголемите коалиции без разлика кој ги предводи. Помалите партии, особено кај албанските партии, кога носат одлука на емотивен начин, така се подели АА, тука е спорот. Традиционално се покажало дека кога сте мала партија и одлучувате да не влезете во владеачка коалиција, вие не можете да додржите едно ниво на активност, јадро од вашето членство кое ќе биде ангажирано на државни вработувања“изјави аналитичарот Сашо Орданоски на поткастот „Политиканти“ на „Слободен печат“.
Тој додаде дека атмосферата да се биде во коалиција со или против ДУИ е примарно прашање во албанскиот електорат, не само на ниво на партијата Алијанса.
„Оваа кавга која сега се случува меѓу Села и Таравари ескалираше на еден начин за кој мислев дека ќе се одвива подалеку од јавноста“, посочи Ордановски.
Тој додаде дека партиската политика во нашата земја е многу персонализирана.
„Да речеме, Села има биографија која се оптегнува со децении наназад и е резултат на разни конфликти во претходни партиски формации. Претпоставував дека Мендух Тачи со пуканки го следи шоуто. Има една доза на емотивност. Изборите се математичка операција. Ако тука влезете со емоции веројатно ќе ја утнете равенката за тоа што ви носи или не ви носи гласови“, рече Ордановски.
Тој додаде дека со оглед на ваквиот распоред и најавите за тоа какви ќе бидат изборните резултати, изборите се потпираат на една точка која е почетна за сите други анализи.
„Прашањето е дали фигуративно речено, по изборите, Мицкоски ќе успее да направи влада или нема да успее. Тоа ќе го покажат изборните резултати. Се разбира дека тие најавуваат големи победи и тн., но ако тие изборни резултати не бидат такви за да може комотно да бира партнери, туку да мора. Ако Мицкоски не биде мандатар за следната влада тој е следното утро политички мртов“, истакна Ордановски.
Тој додаде дека ако се создаде политички блок против ДУИ, тоа ќе биде примарното прашање, а не дали ќе влеземе во ЕУ.
„Ако го слушнеш Антонијо Милошоски за надворешната политика на владата на ВМРО после изборите, никакви шанси нема за уставни промени. Тој вели дека Бугарија не е примарен партнер за разговори за влез во ЕУ. Они се бават со рамката ЕУ. Повторно би отварале разговори со Франција и со Германија, да се промени рамката, тоа е рецепт за губење време“, заклучи Орданоски.
