ВЕСТ НА ДЕНОТ
ЕУ избори: ЕПП е најбројната политичка групација во Европскиот парламент со освоени 181 пратеничко место
Десно центристичката Европска народна партија (ЕПП) ќе остане најбројна политичка групација во Европскиот парламент со освоени 181 пратеничко место, пред лево центристичката Прогресивна алијанса на социјалистите и демократите (СД) со 135 европратеници, покажуваат излезните анкети од европските избори што се одржаа од четвртокот до недела во 27-те земји членки на ЕУ.
Трета политичка сила остануваат либералите со 82 мандати, пред десничарската група Европски конзервативци и реформисти (ЕЦР) со 71 и екстремно десничарска групација Идентитет и демократија (ИД) со 62 места. Блокот на Зелените и Европска слободна алијанса (ЕФА) освои меѓу 53 европратеници, а Левицата 34 места.
ИЗЈАВА НА ДЕНОТ
Судскиот активизам, враќањето на довербата на граѓаните во Уставниот суд и во правната држава, внесување на науката во Уставниот суд, како и бескомпромисност во обидите за политички и какви било други влијанија врз Судот или врз уставните судии, ќе бидат главни приоритети на новиот претседател на Уставниот суд, Дарко Костадиновски.
РЕГИОН
Бугарската централнодесничарска партија ГЕРБ е на пат да освои најмногу гласови на парламентарните избори, но ќе и требаат коалициски партнери за да формира влада, покажаа денеска привремените резултати врз основа на 64,06 отсто од преброените гласови.
*
Фреди Белери, cause célèbre: Албански градоначалник со грчко потекло во албански затвор за купување гласови – избран за грчки европратеник.
СВЕТ
Швајцарија ќе организира конференција за Украина претстојниот викенд, при што светските лидери ќе разговараат за тоа како да се постигне евентуален мировен процес, иако Русија нема да учествува.
Собирот доаѓа веднаш по самитот на Г7 во јужна Италија, што ќе трае од четврток до сабота, за време на кој богатите демократии ќе разговараат и за Украина во присуство на нејзиниот претседател Володимир Зеленски.
ТЕХНОЛОГИИ
Промоцијата на книгата „Човекот, роботот и дигиталниот бог“ од Џабир Дерала и Валентин Нешовски ќе се одржи во Рок бар „Гарсон“ на 11 јуни (вторник), со почеток во 19:30 часот, објави Фронтлајн. Промотори на книгата се проф. Емилија Целакоска и Ванчо Орданоски.
СЛОБОДНА ЗОНА
„Ноќта на 9 јуни беше напната и тешка за Европа – соочена со вистинска наезда од радикалните политички сили. Крајно десничарските партии освоија околу 150 од 720 места во Европскиот парламент. Ксенофобија и антимигрантски политики, радикален национализам, евроскептицизам, противење на помошта за Украина, авторитарно наспроти демократско владеење – се главните одлики на крајната десница што бележи подем на европските избори оваа година“, пишува Џабир Дерала во колумната „Европски избори: Наезда на радикалите“.
*
„А што ќе прават сега вмровците кои гласаа за да нема веќе ДУИ…како по обичај, вмровците ќе блејат.
Како што кажал народниот мудрец деновиве во некоја кладилница: Животот е тежок, но барем не навивам за Барса и не гласав за ДПМНЕ.
Наум Стоилковски ги изгрицкал бисквитите? Нека јаде сега гурабии. И нека мачка вазелин на градите патриотски, да не го боли душата“, пишува Драган Мишев во колумната „Ако немаат бисквити, нека јадат гураби“.
*
„За жалење е што уметноста е ставена на диспозиција на политичарите, а уметниците низ целиот свет се најсилната опозиција на политиката! На страна политичката / партиската / владината сопственост на уметноста и уметниците, она што ми остави впечаток е дека „цела Филхармонија“ се кренала на нозе затоа што нов директор ќе биде – „ЛЕЛЕ, АЛБАНЕЦ“!, пишува Дијана Тахири во колумната „Филхармонија „наша“, „чиста“ македонска!“.
Д. Муратов
