Грчката владејачка партија направи исклучително спорен избор за учество на европските избори што се одржаа вчера – Фреди Белери, градоначалник на градот Химара на албанската ривиера, кој е во затвор поради поткуп на гласови.
Затворањето на Белери е cause célèbre (контроверзно прашање кое привлекува големо внимание на јавноста) во Грција, бидејќи тој е етнички Грк, а тензиите меѓу Атина и Тирана околу неговото притворање сега се закануваат да влијаат на напорите на Албанија за пристапување во ЕУ.
За Грците, Белери е жртва на измислени политички обвиненија, додека за Албанците тој е застрашувачка личност, поврзана со вооружените бунтови на етничкото грчко малцинство. Исто така, тој нашироко се сметаше за клучен противник на албанската влада во случаите со запленување на имотите на етничките Грци околу Химара.
За конзервативната партија Нова демократија на премиерот Кирјакос Мицотакис, изборот на Белери за кандидат за Европскиот парламент значеше деликатна политичка калкулација, пишува Политико.
Белери, кој има и грчко државјанство, беше кандидат на албанската опозициска партија на изборите за градоначалник во Химара, град во јужна Албанија со големо етничко грчко население, во мај 2023 година. Тој беше уапсен два дена пред гласањето за наводно нудење 40.000 албански леки (395 евра / 425 долари) за купување осум гласови.
Номинацијата за пратеник во Европарламентот, која го стави Белери на 25-то место на партиската листа од 42 кандидати, дополнително ги оптоварува односите меѓу двете соседни земји и предизвика интензивна дебата на двете страни од границата.
Белери е контроверзна личност во Албанија. Во 1994 година, тој беше под истрага за наводна вмешаност во напад во кој беа убиени двајца офицери на албанската армија. Не беа пронајдени докази за поддршка на обвиненијата. Една година подоцна, во 1995 година, тој беше уапсен на грчко-албанската граница и осуден во Грција за нелегално поседување оружје.
Некои Грци го гледаат како жртва на политички прогон и бранител на имотните права на етничките Грци во Химара, каде владата се надева дека ќе изгради луксузни туристички одморалишта, се наведува во анализа на Дојче Веле.
Поддржувајќи го етничкиот Грк во албански затвор, Нова демократија може да се „пофали“ со своите патриотски ингеренции и да се обиде да се спротивстави на напливот на поддршка за екстремно десничарските партии, вклучително и националистичкото грчко решение и ултраортодоксната партија „Победа“.
Фреди Белери излезе со реакција по обезбедувањето место во Европскиот парламент, како европратеник на политичката партија на грчкиот премиер Киријакос Мицотакис.
Белери преку порака од затвор го опишува неговиот избор за европратеник како победа на светлината над темнината. Тој порача дека војната е добиена благодарение на гордоста и патриотизмот на Грците. Во пораката до поддржувачите, подвлекува дека гласот на малцинството сега ќе биде уште посилен.
„Во текот на сите месеци на мојата авантура, зајакна моето верување дека светлината секогаш победува над темнината. А дека моќта на демократијата може да ја преврти секоја пучистичка практика, доволно е да се има волја и верба во повисока цел. Како што се боревме во оваа војна. Борба за демократија, владеење на правото, слободи и достоинство на граѓаните.“, вели Белери, пренесува Еуроњуз.
Според бројот на освоени гласови, Фреди Белери во моментов е трет кандидат од Нова Демократија на изборите за Европскиот парламент во Грција, каде по сè изгледа ќе обезбеди место во Европскиот парламент бидејќи таму партијата на грчкиот премиер ќе биде претставена со 7 пратеници.
Грчкото Министерство за надворешни работи покрај претпазливоста на „играње политика“ со Белери, изрази „силна резервираност“ за неговата кандидатура, изјавија неколку официјални лица за Политико.
Во Химара вчера граѓаните со огномети ја прославија победата на Белери кој е во затворот Фиер по истрагата на СПАК за купување и продавање гласови на изборите на 14 мај 2023 година, каде што беше кандидат за градоначалник на општина Химара, јавуваат албански медиуми.
Д. Тахири
