Отворањето на рудник за литиум во долината Јадар е прашање кое, се чини, како ниедно досега, успеа да ги обедини граѓаните на Србија. Предводени од активисти, експерти и јавни личности по улиците на градовите, тие побараа забрана за ископ на литиум и бор во земјата, а владата одговори со репресија на активистите, дискредитација и напаѓање експерти и јавни личности, а потоа повика на дијалог. Досегашната практика покажува дека актуелната власт е окупирана од луѓе кои не сакаат никаков дијалог и дека од нив не може да се очекува рамноправен и толерантен дијалог, објави белградската медиумска платформа Н1.
Ана Брнабиќ, поранешна премиерка, а сега претседателка на српското собрание, неодамна се обиде да договори средба со Иванка Поповиќ, професорка на Технолошко-металуршкиот факултет и членка на граѓанската иницијатива ПроГлас, која веднаш ја одби поканата. Иницијативата ПроГлас тогаш објави дека никој од нејзините членови нема да одговори на поканата за „разговори“ зад затворени врати со кој било носител на актуелната власт.
„Голем број српски граѓани можеа да дознаат за иницијативата ПроГлас само слушајќи ги навредите и омаловажувањата што Ана Брнабиќ и нејзиниот ‘газда’ Александар Вучиќ ги упатуваа во медиумите, а нам никогаш не ни беше дадена можност ниту на јавниот сервис да им одговориме. Затоа ПроГлас на секој повик за ‘разговор’ гледа како на принуден тактички маневар на владата, која нема одговор на масовно изразеното барање на српските граѓани да го прекине проектот за ископ на литиум. За несоодветноста на тој повик говори и тоа што доаѓа во време кога бројни еколошки активисти и граѓани се подложени на гола репресија и заплашување, со приведување и апсење за наводно поткопување на уставниот поредок“, изјавија, меѓу другото, во изјавата, претставниците на ПроГлас, како што објави Н1. Во прилогот на Н1 има повеќе соговорници кои говорат за невозможноста од дијалог со српската власт.
Извор: N1info.rs
Обработка: ЦивилМедиа
