Веќе втора недела како железничкиот сообраќај е во целосен прекин. Штрајкуваат вработените кои сè уште ги немаат добиено јануарските плати.
Работниците не се согласуваат да почнат да работат сé додека не им се исплати јануарската плата. Министерот за транспорт и врски, Владо Мисајловски вчера изјави дека за да ги добијат своите плати, „МЖ Транспорт“ и „МЖ Инфраструктура“- треба да работат.
„Сè што ќе сработат во текот на месецот, треба да го фактурираат до Министерството за транспорт и врски, а Министерството веднаш да ги исплати сите средства, бидејќи тоа се оперативни трошоци што ги покрива Владата. Сè она што ќе биде профит и приход на претпријатието останува таму, но за да ги фактурира сите оперативни трошоци и загуби, мора да работи“, рече Мисајловски.
Ѓоко Илиевски, од Иницијативниот одбор на протестот вели дека вработените не се согласуваат со министерот, и дека тие ги бараат парите за месец кој веќе е одработен.
„Не е проблемот во тоа дали работиме или не. Сакаме она што сме го изработиле, да ни се плати. Сè додека парите не легнат на нашите сметки, ние ќе протестираме. И да потсетам, ние сме на работните места и чекаме“, изјави Илиевски.
„Мисајловски лаже. Според Законот за работните односи (член 109): Платата се исплаќа најдоцна 15 дена по изминувањето на исплатниот период. Ова значи дека веќе требало да биде исплатена платата и нејзиното неисплаќање не само што нема врска со штрајкот, туку, е и спротивно на законот. Уште повеќе, според членот 260 од Законот за работните односи: (1) Организацијата надлежна за работите на јавните приходи е должна да го известува надлежниот инспектор на трудот, за работодавачите кои не извршиле пресметка и исплата на плати, односно, најниска плата за претходниот месец. (2) Известувањето од ставот (1) на овој член се доставува до инспекторот на трудот според седиштето на работодавачот. Тоа значи дека работодавачот треба да биде казнет заради ненавремено исполнување на законската обврска“, напиша професорката д-р Мирјана Најчевска, поповод штрајкот, на својот Фејсбук профил.
Минатата недела, директорот Никола Костов поднесе оставка, а на негово место Владата за в.д. директор го назначи Игор Коруновски, кој веднаш по назначувањето, оствари средба со владини претставници, но јавноста не беше информирана што е договорено на состанокот.
