ЉУБОМИР КОСТОВСКИ
Надвор од сите елементарни правила за пренос од настани поврзани со несреќата која ја задеси земјава, уредничката и водителка на вестите во 17 часот – Марина Доковска ја прекина прес конференцијата на СДСМ. Истата беше посветена на одговорот на оваа партија на факти изнесени од министерот за внатрешни работи кој цел ден се обидува да ги искривува нештата и да ја трга одговорноста најнапред од секторот кој го покрива, пренесувајќи ги своите функции на секој, како што рече, кој во изминатите 30 години имал било каква власт или моќ.
Најнапред е просто долно како се прекинува пресот во мигот кога се изнесуваат јасни прашања што си ги поставува и јавноста – кој е одговорен што овој објект е пуштен одново како наводно реновиран летоска, кога целата власт во земјата, на централно или локално ниво ги имаше токму ВМРО-ДПМНЕ? И тука Доковска рече дека за остатокот од пресот ќе ги извести гледачите во некои од другите информативни емисии!? За да продолжи со веќе бајати вести за тоа како странскиот печат известувал за трагичниот настан во земјава. Тоа не може да се одложи, да не кажам да се репризира по кој знае кој пат?
Или на Марина Доковска ѝ се запали некоја алармна светилка во студиото и таа се исплаши дека поминала некоја црвена линија што ја поставиле оние кои овој сервис (што треба да ѝ служи на јавноста) го сметаат за приватен, односно партиски билтен!? Треба тој прес на Чупеска сега во штабот на Тошковски да се преработи, обработи, да се најде одговор на она што евентуално ќе се пушти од СДСМ, ама во истиот миг да се одговори на него, каква што е праксата во МТВ веќе 15-16 години во континуитет!
Не беше ова ден за партиски пресметки, најмалку за тоа, но путерот на главата на Тошковски, што се вели, почна да му тече штом стапна во Кочани, па почна да зборува за безграничната одговорност (без некој да ја спомене одговорноста) и продолжи тоа да го прави на сите појави пред камерите, кога главно одбиваше да одговори на најголем дел од поставените прашања. Но затоа тој, а не истрагата, која е во рацете на обвинителството на чија УСЛУГА ѝ е полицијата, се прогласи за единствениот што може да зборува. Најмалку тој треба да држи во рацете наводни факти и документи (буквално) и да одредува што може да се покаже, а што не…
Впрочем, тој уапсил околу 20 лица и сите, за чудо (!), од поранешните централни власти, а ниту еден од актуелните или локалните кои се тука во Кочани барем три и пол години во континуитет.
Тошковски на лице место демонстрираше како ја гледа својата функција – како некој кој обвинува, суди и носи во затвор луѓе по сопствена селекција, без да видиме дека за тоа имал налог од надлежен и претпоставен орган.
