ЦивилМедиа на својата Фејсбук страница го постави ПРАШАЊЕТО НА ДЕНОТ: Што мислите за работата на Антикорупциската комисија?
Граѓаните незадоволни од работата на Антикорупциската комисија: „Не ја бива, само чека инструкции од власта“
По прашањето што го постави CIVIL на својата Фејсбук страница – „Што мислите за работата на Антикорупциската комисија?“, граѓаните со остри и директни критики ја изразија својата фрустрација и недоверба кон институцијата што треба да се бори против корупцијата во земјата.
Поголемиот дел од коментарите одразуваат сериозно незадоволство од тековниот состав на Комисијата, која според многумина, е „недорасната на задачата“. Комисијата се обвинува за неиницијативност, за тоа што „чека сервирани проблеми и решенија“, и дека целосно се ставила во служба на актуелната власт.
„Ептен не сака да покаже самоиницијатива, туку чека сервиран ‘проблем’ и готово ‘решение’ на истиот. Претходната беше појавна, по транспарентна и по решителна,“ напиша еден од граѓаните, барајќи конкретни резултати наместо деманти и празни изговори.
Некои од коментарите се дотерани и до барање за укинување на Комисијата, нарекувајќи ја дури и „корупциска наместо антикорупциска“, со тврдење дека актуелниот состав е под влијание на политички центри на моќ.
Истовремено, се потенцира и контрастот со претходниот состав на Комисијата, кој според дел од коментаторите, работел „турбо“, откривал и документирал случаи, и делувал појавно и јавно. „Поранешните нешто работеа, овие си легнаа на брашното кај ДПМНЕ-то,“ напиша друг учесник во дискусијата.
Еден коментар се наврати и на личен пример од 2012 година, кога според него, повеќе од 100 опозициски општински советници биле казнети по 1.000 евра секој, за наводна корупција – ситуација која според него била резултат на манипулација и дискриминација од тогашната власт, со што ја доведе во прашање и историјата на функционирање на Комисијата уште од времето на режимот на Мијалкови.
Дел од коментарите се и со остро политичко посочување, каде се посочува дека членовите на Комисијата се „полтрони на власта“ и „седнати во скутот на ВМРО“.
Јасна е пораката на граѓаните: довербата во Антикорупциската комисија е сериозно нарушена. Наместо борба со корупцијата, граѓаните гледаат институција која молчи, не реагира и не ги исполнува основните очекувања за транспарентност и независност.
За сите коментари повелете оригиналниот пост на Фејсбук пејџот на ЦивилМедиа.
А.М.
