Скопје, Северна Македонија – 24 април 2025
ЦИВИЛ – Центар за слобода упатува најсилна и најостра осуда на континуираниот, систематски и нечовечки ракетен терор што го спроведува руската воена машинерија врз народот на Украина. Ова не се акти на војна во каква било конвенционална смисла. Ова се намерни злосторства – чист терор, пресметана суровост и зло во неговата најсурова форма.
Ова не е однесување на легитимна држава. Ова е однесување на руска терористичка држава, која ги отфрли сите норми на меѓународното право и моралот.
Со секој ракетен напад врз домови, болници, родилишта и училишта, кремљовскиот режим го открива своето вистинско лице. Овие не се воени цели. Тоа се деца, мајки, цивили. Тоа се животи претворени во статистика од режим опиен од смрт и неказнивост.
Ова не е војна за територија. Ова е војна за уништување на една нација, една култура, еден народ. Војна против сите нас што веруваме во слобода, правда и човечко достоинство.
Гротескна навреда за глобалната правда е што Кремљ сè уште ја окупира позицијата во Советот за безбедност на Обединетите нации, тело создадено да го чува мирот, а сега обесчестено од истиот режим што води геноцидна војна. Тоа што воен злосторник како Путин сè уште добива место на каква било преговарачка маса не е само апсурд – тоа е морална катастрофа.
Ракетните напади уништуваат цели заедници и безброј животи. Украина крвари секој ден под ракетниот терор. Светот не смее да остане рамнодушен.
ЦИВИЛ повикува на итна, одлучна и недвосмислена акција од страна на демократскиот свет.
Украина мора да добие поддршка за да го заштити својот народ и да го победи ова монструозно зло. Тоа значи воена, финансиска и хуманитарна помош, не утре, туку денеска!
Да не се лажеме: ова не е само борба на Украина. Ова е фронтот во борбата за слобода на светот.
Украинскиот народ стои цврсто, бранејќи ја не само својата татковина, туку и основните вредности на слободниот свет. Нивната храброст мора да биде пресретната со меѓународна акција.
Не може да има мир без правда. Архитектите на овој терор, од Путин до секој што учествува во овие воени злосторства или ги овозможува на било кој начин – мора да се соочат со меѓународната правда.
Сеќавањето на невините жртви го бара тоа. Иднината на мирот го заповеда тоа.
ЦИВИЛ е со Украина.
Ние сме со жртвите.
Ние сме со правдата.
Ние сме со човештвото.
Светот мора да проговори во еден глас.
Запрете ја руската воена машинерија.
Скршете го теророт на кремљовскиот режим.
Приведете ја руската терористичка држава пред лицето на правдата.
Бидете со Украина. Сега!
ЦИВИЛ – Центар за слобода
