„Во фаза сме на консултација околу процесот за подготовка на предлог Изборен законик“, велат од Министерството за правда како одговор на прашањата што ЦИВИЛ Медиа ги упати до министерот Игор Филков.
Шест месеци пред одржување на локалните избори, доколку Изборниот законик не претрпи измени, собранискиот спикер Африм Гаши најави дека постои можност тие да се реализираат по постојни законски решенија на 19 или 26 октомври.
Од Министерството за правда за ЦИВИЛ Медиа велат дека рокот за носење на Изборниот законик е јуни 2025 година.
Прашањата за кои побаравме одговор од министерот Филков се:
Дали и кои измени и дополнувања во Изборниот законик може да се очекуваат во пресрет на локалните избори?
Дали е формирана работна група за измени во Изборниот законик, односно дали ќе се реактивира Работната група за изборни реформи што вообичаено ја иницирана Министерството за правда?
Дали планирате вклучување на граѓанското општество и експертската заедница во изборните реформски процеси?
„Министерството за правда ги започна подготовките, но без поддршка од политичките чинители, неговото донесување не може да се реализира. Ќе следат разговори на политичките субјекти. Сепак треба да се има предвид дека изборното законодавство бара широк политички консензус и тука ќе треба конструктивен пристап и поддршка од клучните политички фактори во земјата, нешто кое за жал во досегашните изборни циклуси резултираше со дискрепанци меѓу нацрт верзијата на законот подготвена со поддршка на ОДИХР и усвоениот законик од страна на Собранието“, одговорија од ПР службата на Министерството на поставените прашања.
Одговорот упатува на заклучокот дека сепак одлуките кои ќе се носат во однос на измените и дополнувањата на Изборниот законик, како и секогаш ќе зависат од политичкит партии и колку и за што консензуално ќе се договорат.
Конструктивниот пристап и поддршка од политичките фактори е неизвесен, а улогата на граѓанското општество и експертската заедница е исклучена во одговорот на Министерството.
Министерството за правда посочува дека, за жал, имаше дискрепанци меѓу она што беше доставена како драфт верзија пред парламентарните избори во 2024 година и она што се усвои во Собранието.
Во последните измени беа вклучени некои од претходните препораки на ОДИХР и технички предлози на ДИК. драфт верзијата што не беше ниту разгледана во Сабранието беше резултат на Работната група за изборни реформи, иницирана од Министерството за правда
Она што се донесе како измени беше Предлог за Закон за изменување и дополнување на Изборниот законик по скратена постапка од група пратеници: Мартин Костовски (СДСМ), Никола Мицевски (ВМРО-ДПМНЕ) и Арбер Адеми (ДУИ)
Работната група заврши со работата на 7 ноември 2023, во дадениот рок оставајќи доволно време за партиите во Собранието да ги разгледаат и донесат одлука. На седицата, покрај инситутициите, редовно со конструктивна дебата и препораки учестувавше и ЦИВИЛ со тројца претставници.
Биљана Јордановска
