Редакцијата на Цивил Медиа, на социјалната платформа вчера го постави прашањето за работата на банките, прашање кое ги засега сите граѓанки и граѓани во земјава, пред се поради високите тарифи за банкарските услуги и нетранспарентноста.
На прашањето „Што мислите за работата на банките“, граѓаните беа речиси со унифициран одговор – ги сметаат банките за „лихвари“.
Лихвата (народно), или каматата е она од што банките црпат огромни средства од граѓаните, но, за разлика од лихварството во раце на поединци, е регулирано според посебни закони, и според кои регулативи, кога граѓанин ќе позајми пари од банка, се обврзува на исплата со одредена камата. Но, според одговорите и искуствата на граѓаните ( од кои добивме и пораки во сандаче), лихвата ја препознаваат највеќе во другите услуги, како што се одблокирање на сметка, за која банката автоматски одзема над илјада денари наплата.
„Нетранспарентни и нефлексибилни, а од друга страна најголеми лихвари, заштитени со закон и соучесници за уништување на луѓето“- гласи еден од одговорите на прашањето.
Банките често прават измени на тарифниците, обично со зголемување на тарифите за различни услуги, како што тоа неодамна беше случајот со една од банките која по измените ги извести своите корисници, дека покрај другите измени, ќе се наплаќа секој преглед на состојба на сметка…
„Не е „работа“, тоа е целно организирана нон-стоп акција за грабеж на сопствените сограѓани!! За реализирано хакерство, инстант атак врз хакираните комитенти: “Виновни сте вие, никој друг”! За отворање сметка – може и тоа сега и овде! А затворање – 10 до 14 работни денови!!!
Полегална пљачка – здравје!!!“, гласи друг одговор од граѓанка.
Оттука, граѓаните со право банките ги нарекуваат лихвари, бидејќи лихварството е синоним за пљачка, односно наплаќање камата во (често) поголем износ од главнината.
„Лихварство, лоповлук, со амин на владејачката структура“, „Лихвари“, „Крвта ни ја испија“, „Легални каматари“- се дел од одговорите од граѓаните, на прашањето „Што мислите за работата на банките“.
Оваа ситуација укажува на потребата од поголема транспарентност и регулирање на банкарските услуги, како и заштита на правата на потрошувачите.
Граѓаните, преку своите искуства и коментари, јасно изразуваат незадоволство од банкарскиот сектор, посочувајќи ја потребата од поголема транспарентност и фер услови за сите клиенти.
Редакцијата на ЦивилМедиа, ги охрабрува граѓанките и граѓаните да дадат свои одговори, пораки и сугестии на прашањата на денот, и е простор во кој секогаш можат да се обратат со свои прашања, коментари, споделување искуства, критики или пофалби.
Сите прашања на денот може да се најдат во рубриката ФОРУМ на интернет весникот ЦивилМедиа.
Д. Т.
