Во период од еден час, на 25-ти март, повеќе од 7.000 градови од 178 земји во светот, ќе потонат во мрак! Македонија годинава по осми пат се приклучува на акцијата „Часот на планетата Земја“ и во сабота, во 20 часот и 30 минути, по локално време, ќе ги исклучи светлата и со тоа ќе испрати порака за спас на планетата.
Политичката криза во земјата, како што велат организаторите на акцијата во Македонија, се одразува и врз граѓанскиот сектор, па поради тоа, оваа година одлучено е да се намали интензитетот на акцијата и да се организира само исклучување на осветлувањето на одредени локации во Скопје и во Охрид.
Како што е најавено, во Скопје во мрак ќе потонат Плоштадот Македонија со спомениците, Порта Македонија, Камениот мост, Скопската тврдина, Македонскиот народен театар, Музејот на македонската борба, Археолошкиот музеј, објектот на АЕК, Колонадата, Јавното обвинителство на Република Македонија, Министерството за надворешни работи, Мостот „Око“ и Мостот на уметноста.
Во Охрид, пак, во мрак ќе потонат Црквата Свети Јован Канео и Самуиловите тврдини.
Своја поддршка кон акцијата најави Македонски телеком, чија административната зграда во центарот на Скопје ќе бид еисклучена, како и цементарницата „Усје“, која ќе ги исклучи светилките и сите мелници за цемент во својата фабрика.
Оваа година, под мотото „Заблескај светлина на климатските промени“, кампањата се фокусира врз сериозноста на проблемот поврзан со забрзаното менување на климата, и има за цел да ја промовира идејата дека сите имаат моќ да направат промена.
„Можеби исклучувањето на светилките во вашиот дом нема да направи голема разлика локално, но замислете го ефектот кога милиони луѓе ширум светот, во сабота во 20:30 часот ќе ги исклучат светилките, испраќајки порака дека на планетата ѝ е потребна акција за спасување, веднаш и сега. Тоа е моќта која индивидуалецот ја има за да направи промена“, порачува Ѓорги Селков, организатор на акцијата.
„Часот на планетата Земја“ е глобално еколошко движење креирано од World Wide Fund, со поддршка од Обединетите Нации. Како една од првите кампањи, креирана од луѓето за луѓето, „Часот на планетата Земја“ прерасна во симболичен настан што се одбележува во многу градови и земји, поддржан од индивидуалци, бизниси, организации и влади, со цел да се подигне еколошката свест кај граѓаните.
