Новата директорка на Националното разузнавање на САД, Тулси Габард, објави видео за кое многу набљудувачи велат дека тесно ги одразува наративите што ги промовира Кремљ.
Директорката на Националното разузнавање Тулси Габард, во видео порака објавена на социјалнат мрежа Х во вторникoт, по нејзината посета на Хирошима, предупреди дека светот е „поблиску до работ на нуклеарно уништување од кога било досега“ и повика на отфрлање на „патот кон нуклеарна војна“, обвинувајќи неименувани политички елити дека се обидуваат да поттикнат конфликт меѓу светските сили.
„Ова е реалноста за тоа што е во прашање, со што се соочуваме сега, бидејќи, додека стоиме тука денес, поблиску до работ на нуклеарно уништување од кога било досега, политичките елити на војната небрежно поттикнуваат страв и тензии меѓу нуклеарните сили,“ вели Габард за на крајот да заклучи: „Значи, од нас, луѓе, зависи да проговориме и да побараме крај на ова лудило. Мораме да го отфрлиме овој пат кон нуклеарна војна и да работиме кон свет каде што никој не мора да живее во страв од нуклеарен холокауст.“
Иако Габард не наведува ниедна земја по име, сепак нејзините забелешки ги повторија долгогодишните тврдења на руските пропагандисти, а од неодамна и на крајно десничарските коментатори во САД, кои предупредија дека украинскиот напад со беспилотни летала врз руската флота на стратешки бомбардери претходно овој месец ја направи нуклеарната војна поверојатна.
Според критичарите, во видеото таа сугерира дека западните „политички елити“ се залагаат за нуклеарен конфликт со Русија – тврдење што претставува ехо на наративите на Москва дека на светот му се заканува нуклеарна војна доколку западот продолжи да и помага на Украина во нејзината одбрана од руската агресија, што ги вознемири аналитичарите и политичките експерти.
Дополнително, аналитичарите тврдат дека нејзината порака опасно ја намалува улогата на Русија во војната и ја засилува реториката базирана на страв, наместо решенијата.
Со зголемувањето на глобалните тензии, јасноста и одговорноста во комуникацијата се поважни од кога било.
Драган Мишев
