Во Косово денеска не успеа ниту 50-тиот обид за конституирање на собранието, рокот за конституција даден од Уставниот суд поминува на 26 јули, јавуваат косовските медиуми.
Во Албанија, поранешниот генерален директор на државната полиција, Гледис Нано, ја доби правната битка со албанската влада која ќе му исплати 100 илајди евра отштета за отпуштање.
Во продолжение се поместени содржините од денешниот редакциски избор на ЦивилМедиа, од албанските медиуми во регионот.
КОСОВО
Газета експрес: 50 неуспеси – Дехари и денес ја прекина седницата откако комисијата предложена од ЛВВ доби само 53 гласа
50-тиот „обид“ за конституирање на Собранието исто така не успеа. Претседавачот на седницата, Авни Дехари, ја прекина седницата откако повторениот предлог за формирање комисија за тајно гласање за избор на претседател на парламентот не ги доби потребните гласови.
На претставниците на ПДК, ЛДК и ААК не им беше дозволено да зборуваат, како и претходно, додека се обидуваа да му кажат на претседателот дека е злоупотребен од партијата и да го замолат да го почитува Уставот, откако Дехари ги покани претставниците на другите политички партии да предложат имиња за членови на комисијата за тајно гласање.
Комисијата предложена од ЛВВ за тајно гласање доби само 53 гласа.
Ситуацијата во Собранието не се промени ниту по одлуката на Уставниот суд, која ги обврзува пратениците да го конституираат Собранието. Таа одлучи дека пратениците мора да ја завршат конститутивната седница во рок од 30 дена, најдоцна до 26 јули, пренесе Газета експрес.
РСЕ: Српската опозиција во Косово бара единство за локалните избори
Во пресрет на локалните избори во Косово, закажани за 12 октомври, во српската заедница се зголемуваат гласовите кои повикуваат на единство и создавање заедничка платформа за дејствување.
Иницијативата за формирање пошироко народно движење, кое, како што се вели, би се спротивставило на актуелните политики во Приштина и Белград, доаѓа од редовите на опозициските актери кои се незадоволни од положбата на Србите во Косово.
Лидерот на Српското народно движење, Милија Бишевац, вели дека е време политичката борба да се води јасно, без поделби, страв или партиски пресметки.
Во меѓувреме, Стефан Вељковиќ, од Српската демократска партија, вели дека нивните повици за конкретни акции на терен долго време се игнорирани.
Тој не ја исклучува соработката со други, освен со високи функционери на Српската листа – главната српска партија во Косово, која има поддршка од Белград, пренесе РСЕ.
АЛБАНИЈА
НОА: Гледис Нано го доби судењето со Владата, 100 илјади евра отштета за отпуштањето
Поранешниот генерален директор на државната полиција, Гледис Нано, ја доби правната битка со албанската влада. Административниот апелационен суд ја потврди одлуката на Првостепениот суд, прогласувајќи го неговото разрешување од функцијата за незаконско.
Одлуката ја донесе судски совет составен од Ардијан Дворани, Гентијан Хамити и Сокол Иби, кои ја отфрлија жалбата на Советот на министри и Министерството за внатрешни работи, кои побараа поништување на одлуката со која Нано беше пресуден во негова корист.
Врз основа на оваа конечна одлука, албанската држава е должна да му исплати на Гледис Нано надомест од 60 месечни плати, што се совпаѓа со петгодишниот мандат на неговиот прекинат мандат, во вкупна вредност од околу 100 илјади евра, објави НОА.
Топ чанел: Албанската здравица прогласена за национално културно наследство
Ритуалот на здравица сега е признат како национална вредност на албанското наследство, по одлуката донесена на состанокот на Националниот совет за нематеријално културно наследство.
Здравицата е вообичаена појава во форма на семеен ритуал кој првенствено се занимава со зближување на луѓето на семејни или социјални пригоди и претставува висок степен на албанско гостопримство.
Ритуалот на наздравица, низ вековите, добил форма на морален кодекс почитуван и имплементиран низ целиот наш простор, во кој се меѓусебно поврзани многу други елементи од нашето духовно наследство, пишува Топ чанел.
КОЛУМНА
Коха: „ЕУ ја започна најголемата битка – онаа за пари“
„Нема ништо за што земјите-членки и институциите на ЕУ се борат повеќе од парите. Минатата недела, со предлогот за буџет од 2 трилиони (или 2.000 милијарди) евра, за период од седум години, започна оваа битка.
Ова значи дека по 2028 година годишниот буџет на ЕУ ќе биде над 280 милијарди евра. Оние кои плаќаат повеќе веднаш рекоа дека „тој е неоправдано превисок“, додека оние кои добиваат повеќе рекоа дека „тој е премал за да се спроведат приоритетите“.
Оваа битка мора да се води во следните две години, бидејќи буџетот на ЕУ зборува за вистински политички приоритети повеќе од која било јавна декларација.“, пишува Авторот Аугустин Палокај во колумната „ЕУ ја започна најголемата битка- онаа за пари“, објавена во косовскиот дневник Коха.
Подготви: Д. Тахири
