Во период кога Македонија се обидува да ги надмине последните бариери кон Европската Унија, новата власт предводена од Христијан Мицкоски и ВМРО-ДПМНЕ се чини дека свесно отвора стари рани и го поткопува патот кон Брисел. Последниот потег – предлогот за резолуција со Бугарија за македонскиот јазик и идентитет – наместо да ја зацврсти позицијата на државата, според експертите и политичките аналитичари, води кон самосаботажа на европскиот курс.
Нано Ружин: Ова е игра за внатрешна употреба, не за реална дипломатија
Професорот и поранешен амбасадор во НАТО, Нано Ружин, во изјава за Фронтлајн ја опиша резолуцијата како политички театар за домашна публика, а не како сериозен обид за решавање на спорот.
„Резолуцијата на ВМРО-ДПМНЕ е повеќе за внатрешна употреба… тешко е дека таа ќе биде прифатена од страна на Софија,“ вели Ружин, додавајќи дека дипломатските процеси не се „бинг-бинг“ игри каде се добива сè без компромис.
Според него, фокусот одамна е пренасочен кон Брисел, а не кон Софија, и резолуцијата повеќе служи за рејтиншко позиционирање на ВМРО-ДПМНЕ, отколку како реален дипломатски механизам.
Николовски: Прашањата се затворени, ВМРО-ДПМНЕ отвора врати што одамна се заклучени
Извршниот директор на Евротинк, Димитар Николовски, потсетува дека прашањата за јазикот и идентитетот веќе се решени и потврдени во европските документи.
„Резолуцијата пред се не е потребна. Прашањето со јазикот е веќе затворено со постоечки документи на ЕУ, а за идентитетот е непотребно да биде решен со политичка декларација. Во овој момент, не се преговара за идентитетот, а многувековноста е исто така проблематична затоа што отвора повеќе прашања и интерпретации отколкку што затвора. Од друга страна, наивно е да се очекува дека Бугарија ќе прифати вакво нешто без да даде и своја контра-понуда, со изнесување на факти кои не би нѝ се допаѓале нам,“ потенцира Николовски.
СДСМ: Штетна резолуција што ѝ дава простор на Бугарија за нови условувања
Во слична линија беше и реакцијата на СДСМ, преку заменик-претседателката Кристина Костова, која го нарече потегот на ВМРО-ДПМНЕ намерно отворање на затворени прашања со цел политичка манипулација.
„ВМРО-ДПМНЕ отвора прашања кои веќе се затворени… ваквиот потег ѝ дава дополнителен маневарски простор на бугарската страна за нови условувања,“ вели таа.
Од СДСМ прашуваат:
„Дали ВМРО-ДПМНЕ свесно сака да ја втурне државата до пораз во пораз за потребите на своја кампања?“ и дали „ова не е уште едно договорено сценарио со дел од ним блиски бугарски европратеници“?
Политика на саботажа или стратегија на одложување?
Критичарите сè погласно зборуваат дека оваа резолуција нема реална вредност во односите со Бугарија или со ЕУ, туку има единствена цел – да се продуцира вештачки конфликт кој ќе му овозможи на ВМРО-ДПМНЕ да глуми заштитник на националните интереси, додека всушност ја саботира интеграцијата.
Резолуцијата на ВМРО-ДПМНЕ не е израз на државничка грижа туку партиски трик со висока цена. Во време кога земјата треба да ги фокусира сите напори кон членство во ЕУ, отворањето на прашања кои се веќе затворени значи само едно: одложување, блокирање и изолација.
Дестан Јонузи/ Фронтлајн
