За жал, Република Северна Македонија, откако сама го блокираше својот пат кон ЕУ, влезе во наративот на “српскиот свет”, изјави за ЦивилМедиа, Џелал Хоџиќ, претседателот на СДА Македонија.
Наративот на “српскиот свет” е составен во голема мерка од пропагандата на големосрпската политика, која уште има за цел промени на границите на државите од Западен Балкан. И Северна Македонија тука не е исклучок, смета Хоџиќ.
Според него, пропагандата на големосрпската политика прави проблеми и во Босна и Херцеговина, Црна Гора, Косово, па и во Северна Македонија.
Она што нас треба сериозно да нѐ загрижува е дека во БиХ, Црна Гора и Косово можете да видите организирано спротивставување од политичките претставници на Бошњаците, Црногорците, Албанците… како и од етничките Срби кои државите во кои живеат ги гледаат како членки на НАТО и ЕУ, вели претседателот на СДА Македонија.
Тоа што е специфично за Северна Македонија е дека политичките претставници на Македонците едноставно со премолчување го дозволуваат дивеењето на големосрпската пропаганда во нашата држава, додава Хоџиќ.
Во нашиот случај многу е гласен молкот на политичките партии ВМРО – ДПМНЕ и ЗНАМ. Тие не само што не се спротивставуваат, туку се и соучесници со нивното нереагирање. Овие две самонаречени патриотски партии, кои се гласни во наративот “Македонија повторно твоја”, кој е замена на парлота “Македонија на Македонците”, кога денешната територија на Северна Македонија се прогласува за српска земја во наративите на големосрпската политика, едноставно како да не смеат да кажат лош збор против режимот на Вучиќ и големосрпската пропаганда.
Според Хоџиќ, со тоа што Владата на Мицкоски го постави Иван Стоиљковиќ за вицепремиер, само ја потврди политичката ориентација на новата Влада, која ги стопира европските интеграции на нашата заедничка држава, ги заладува односите со Грција, ги влошува односите со Бугарија и Албанија, а Северна Македонија со голема брзина ја внесува во “српскиот свет”.
Овој инцидент, со министерката на Србија во Битола, на ден пред Денот на независноста, е само уште еден во серијата на инциденти на големосрпската пропаганда.
Јас ќе ве потсетам кога Додик во сред Скопје, во присуство на премиерот Мицковски и добар дел од неговата Влада, испрати анти-НАТО и анти-ЕУ пораки, со јасни тези на големосрпската пропаганда. ВМРО-ДПМНЕ и ЗНАМ дозволуваат големосрпската пропаганда од сред Северна Македонија да ги навредува и нашите стратешки цели како држава, но и нашите стратешки пријатели веќе во јасен континуитет.
Прозападните политички сили во државата мора да се координираат и да дадат свој јасен политички одговор на ова прашање, дециден е Хоџиќ.
Д. Мишев
