Ромите во Виница денеска излегоа на протест барајќи правда за нивниот сограѓанин Умут Скопко, кандидат за советник од Демократски сили на Ромите (ДСР) на листата на ВМРО-ДПМНЕ, кој пред десет дена беше брутално претепан затоа што одбил да се повлече од изборната листа.
Скопко сè уште се наоѓа во тешка здравствена состојба на скопските клиники.
Протестот се одржа пред полициската станица во Виница, каде што се обратија неговите ќерки Хавин и Фатма Скопко, барајќи правда и најстрога казна за напаѓачот.
„Тука сме за правда, не за одмазда. Бараме најстрога затворска казна за лицето кое се обиде да го убие нашиот татко“, порачаа тие.
Шенај Османов објави на својот Фејсбук профил од протест за правда во Виница!
„Денес во Виница се одржа првиот протест на Ромската заедница поради насилството врз Умит Скопко. Со извикување на паролите „Правда за Умит“, „Бараме закон, а не пристрасност“, граѓаните јасно порачаа дека местото на насилникот е во притвор, а не дома.
Овој протест е глас на револт, но и повик за правичност. Нема да има вистинска правда сè додека сторителите на насилства се третираат со поблаги мерки и додека жртвите и нивните семејства чувствуваат неправда.
Очекуваме судската власт повторно да ја преиспита изречената мерка куќен притвор и да донесе правична одлука – ефективен притвор, во интерес на правдата и безбедноста на сите граѓани.
Правдата не смее да зависи од тоа кој е жртвата, а кој сторителот. Правда за Умит!“, истакна Османов.
Од Основното јавно обвинителство Кочани пред неколку дена соопштија дека е донесена наредба за спроведување истражна постапка против едно лице од Виница за кривично дело тешка телесна повреда, според член 131 став 3 во врска со став 1 од Кривичниот законик.
„Осомничениот 37-годишник, на 2 октомври, на паркинг пред ресторан во Виница, со умисла тешко телесно повредил едно лице и му го довел животот во опасност. Откако започнал вербална расправија со оштетениот, пред ресторанот го фатил за јакната и му задал повеќе удари со тупаници во стомакот. Потоа продолжиле да се туркаат и удираат со камења. Во еден момент, осомничениот со камен го удрил оштетениот во задниот дел од главата, по што тој паднал во бесознание“, наведуваат од обвинителството.
Како резултат на ударот, Скопко добил тешка повреда – скршеница на черепот, поради која е во кома и животно загрозен.
Јавниот обвинител веднаш по настанот предложил мерка притвор за осомничениот, која Судот ја прифатил. По отворањето на истрагата, предложен е редовен притвор во траење од 30 дена.
Лидерот на ДСР, Шабан Салиу, чиј член и кандидат за советник е во кома, не се појави на протестот.
Дехран Муратов
Видео и фото: Фејсбук на Пусат Јусеинов
