Исходот од конференцијата на ОН за климата во Белем, Бразил (КОП30) останува нејасен откако Европската унија одби да го прифати нацрт-договорот за кој рече дека нема да ги зајакне глобалните напори за намалување на емисиите на стакленички гасови.
Дводневната конференција требаше да заврши синоќа, но разговорите продолжија доцна во ноќта.
Некои економии во развој го критикуваа ставот на ЕУ и побараа блокот да издвои повеќе средства за да им помогне на посиромашните земји да се справат со климатските промени.
-Не можеме да следиме само еден пат. Ако постои пат за фосилни горива, мора да постои пат за финансирање на климата, рече преговарач кој побара да не биде именуван.
Нацрт-договорот што го дистрибуираше Бразил рано вчера не содржеше ништо за фосилните горива. Европската унија го опиша нацрт-договорот како „многу слаб“.
-Ние нема да го прифатиме ова под никакви околности, рече комесарот на ЕУ за климата Вопке Хоекстра.
Извор од ЕУ подоцна рече дека блокот размислува да се повлече од разговорите, наместо да се согласи на неприфатлив договор.
Нацртот, исто така, бара од земјите да го зголемат тројно финансирањето за прилагодување кон климатските промени до 2030 година во споредба со 2025 година.
Претставник на бразилскиот преговарачки тим изјави дека е малку веројатно дека прашањето за фосилните горива ќе се врати и дека претседателството на самитот инсистира само на мали измени во нацртот.
Други опции што се дискутираат вклучуваат посебни споредни договори за фосилните горива што земјите би ги одобриле доброволно, но без консензус потребен за одлуки на конференциите на ОН за климатските промени, рекоа преговарачите.
Арапскиот блок во разговорите, кој вклучува 22 земји, вклучувајќи ги Саудиска Арабија и Обединетите Арапски Емирати, на состанок зад затворени врати изјави дека нема да дозволи енергетските индустрии да бидат предмет на дискусија, соопштија три извори, пренесе МИА.
