На првата основачка средба на Civil Protection Shelter Coalition при Министерството за внатрешни работи на Украина, што се одржа во Кијив, земјите-членки најавија нови финансиски придонеси во вкупен износ од повеќе од 22 милиони евра за зајакнување на инфраструктурата за заштита на населението во Украина.
Иницијативата е заеднички проект на Украина и платформата Team Europe и има за цел да создаде современа, сигурна и достапна мрежа на засолништа низ целата држава, објави Укринформ.
Премиерката Јулија Свириденко истакна дека присуството на бројни меѓународни партнери во Кијив претставува силна поддршка за украинските напори да обезбедат безбедност за своите граѓани во услови на постојани воздушни напади. Таа нагласи дека коалицијата се фокусира на изградба на нови и реконструкција на постојни засолништа во училишта, детски градинки, болници и други јавни установи.
Финска, како лидер на коалицијата благодарение на нејзиното 80-годишно искуство во развивање системи на цивилна заштита, издвојува најголем придонес – 11 милиони евра. Шведска се приклучува со 7 милиони евра, Литванија и Белгија со по 2 милиони евра, а Ирска со 0,5 милиони евра. Швајцарија, пак, ја изрази својата намера да стане активен член во следните фази.
Меморандумот за соработка беше потпишан од високи претставници на Финска, Белгија, Литванија, Ирска и Шведска, како и од делегацијата на Европската унија и Европската инвестициска банка. ЕУ ќе го кофинансира проектот преку третата компонента на програмата Ukraine Facility, додека литванската Central Project Management Agency и белгискиот Enabel ќе бидат главни партнери во спроведувањето на европскиот дел од проектот.
Амбасадорката на ЕУ во Украина, Катерина Матернова, нагласи дека ова е само почеток на координираните напори да се обезбедат безбедни услови за населението и континуирано функционирање на клучните услуги, особено во медицинските установи.
Коалицијата е дел од Стратегијата за развој на украинскиот фонд на засолништа до 2034 година и ќе работи на повеќе фронтови – од поддршка на изградбата на засолништа со двојна намена, преку координација на донаторите, до развивање современи стандарди за пристапност и инклузивност.
Според најавата од финскиот премиер Петтерии Орпо, како лидер на Меѓународната коалиција за цивилна заштита, Финска ќе ја координира изградбата на 10.000 засолништа ширум Украина во следната деценија – амбициозна цел која ја нагласува долгорошната поддршка на меѓународната заедница, пренесе Уринформ.
