ДРАГАН МИШЕВ
Немилосрдното трошење народни пари за туристички екскурзии на голем број државните функционери и уште поголем број нивни пратители, и покрај изјавата на министерката Божиновска – „како што знаете буџетот не ни е во најдобра состојба“ – продолжува, и тоа со засилено темпо. И додека граѓаните мака мачат да го преживеат месецот со најмалата минимална плата во регионот, за која Владата нема ни слух ни воља да ја зголеми, и покрај галопирачките цени, државните функционери, кои секако добиваат солидни покачувања, патни трошоци, дневници, надоместоци , истовремено се шетаат по белиот свет со пари од истиот тој буџет кој нели, не е во најдобра состојба, а го полнат осиромашените граѓани.
Моментално, во ист период, две масивни државни делегации се наоѓаат на различни дестинации во светот. Собраниско/министерска делегација, во прилично широк состав (претседателот на Собранието, Африм Гаши, потпретседателите Антонијо Милошоски и Јован Митрески, како и владината делегација составена од министрите Стефан Андоновски и Златко Пирински и Генералниот секретар на Владата, Игор Јанушев, плус непознат број помошници), отпатува во САД (по кој знае кој пат „бесцелно“ да се најде во „периметарот“ на Трамп) на, еден „многу значаен“ собир – молитвен појадок во Вашингтон. Меѓу остварените “многу значајни“ средби на маргините на настанот, министерот Андоновски се пофали дека, меѓу другото, , оствариле значајни средби со Меѓународниот републикански институт (IRI) и разговарале за зајакнување на политичкиот дијалог, поддршка на демократските процеси и можностите за продлабочување на соработката, со посебен акцент на дигитализацијата како алатка за зголемување на транспарентноста, интегритетот и ефикасноста на институциите.
Тоа е истиот оној Меѓународен републикански институт (IRI) кој го затвора своето претставништво во Скопје со постапка започната на 1 август 2025 година, врз основа на одлука за престанок со работа донесена на 18 јуни 2025 година.
Истовремено, на другата страна на светот, до Дубаи се прошетаа претседателката Силјановска Давкова, со (според неофицијални информации поради нетранспарентноста на кабинетот на претседателката), заменик генералниот секретар,Горан Момировски, плус и неговиет заменикот на заменикот, „појачани“ со миниетрот за надворешни, Тимчо Муцински, со сѐ уште неколкумина од придружниот персонал, разбира се.
На Самитот на влади во Дубаи , госпожата претседателка имаше обраќање на сесија посветена на демографските промени, каде, меѓу флоскулите како да се задржат младите во земјата, на присутните им раскажа една приказна, дека National Geographic го прикажал наградуваниот документарен филм инспириран од една македонска народна приказна за „Силјан Штркот“, и дека оттука доаѓало и нејзиното моминско презиме, Сиљановска, за да констатира дека „Штрковите не носат бебиња’, но, таа тоа, нели, само како симболика.
Највисоката функција во државата повлекува одговорност, не само лична, туку и државна. Без оглед на тоа колку самитот на кој никој во светот не му придава големо значење, тоа што го кажува на јавна сцена е дел од имиџот на сите нас. На стручни семинари и симпозиуми како професорка може да се брука колку сака, ама не и кога ја претставува државата. Срамота е!
А срамота е и во вакви услови на беспарица, во кои живее сê поголем дел од граѓаните, високите државни функционери со свитите да се „чекираат“ на далечни егзотични патувања, душмански дотрошувајќи ги парите од и онака сê потенкиот буџет, само го покажува немањето сенс за водење грижа за истите тие граѓани кои ги гласале, и од чии пари се платени.
Текстот е личен став на Авторот
