Во ноќта меѓу 6 и 7 март 2026 година, Русија изврши масовен, координиран и смртоносен комбиниран воздушен напад врз Украина, насочен кон енергетската инфраструктура, железничката мрежа и цивилни објекти во повеќе региони низ земјата. Според украинските власти, во нападот биле употребени повеќе од 500 дронови и ракети, при што загинале најмалку седум до осум лица, а значителна материјална штета е пријавена во бројни градови, особено во Харкив.
За рускиот терор против цивилното население и цивилната инфраструктура, со објава на Х се јави и украинската амбасадорка, Лариса Дир.
„Ноќеска рф изврши масовен напад врз Украина: 29 ракети и 480 дронови. Во Харкив, балистичка ракета погоди станбена зграда—загинаа 7 лица, меѓу нив 2 деца, 17+ лица се повредени. Притисокот врз рф и иницијативата PURL мора да се засилат за да се заштитат животите #RussiaIsATerroristState“, напиша амбасадорката.
Ноќеска рф изврши масовен напад врз🇺🇦: 29 ракети и 480 дронови. Во Харкив балистичка ракета погоди станбена зграда—загинаа 7 лица, меѓу нив 2 деца, 17+ лица се повредени. Притисокот врз рф и иницијативата PURL мора да се засилат за да се заштитат животите #RussiaIsATerroristState pic.twitter.com/NfOP4M2Da5
— Larysa Dir (@dir_larysa) March 7, 2026
Според информациите од украинското Воено воздухопловство, руските сили лансирале вкупно 509 воздушни средства за напад. Од нив, 480 биле беспилотни летала – меѓу кои типови како Shahed, Gerbera и Italmas – додека 29 биле ракети, вклучително и хиперсонични ракети Zircon, балистички ракети Iskander-M/S-400 и крстосувачки ракети Kalibr.
Најтешките последици се пријавени во Харкив, каде балистичка ракета погодила петкатна станбена зграда. Во нападот загинале најмалку седум до осум лица, меѓу кои и деца – 13-годишно девојче и 9-годишно момче, додека повеќе од десет лица се повредени.
Нападите погодиле 22 различни локации, при што главни цели биле енергетски објекти во областите Кијив, Хмелницки и Чернивци, како и железничката инфраструктура во Житомирската област.
Експлозии и оштетувања се пријавени и во други делови од земјата, меѓу кои Днипропетровск, Запорижја, Виница, Одеса, Полтава, Суми и Черкаси. Во Запорижја, според локалните власти, во нападите е повредено и бебе.
Поради оштетувања на железничката инфраструктура, државниот железнички оператор „Укрзализница“ беше принуден да пренасочи дел од возовите, што доведе до значителни доцнења на железничкиот сообраќај.
Украинската противвоздушна одбрана успеала да пресретне или електронски да неутрализира 472 од вкупно 509-те нападни средства, соопшти украинското Воено воздухопловство.
Украинскиот претседател Володимир Зеленски ги осуди нападите, опишувајќи ги како „дивјачки удари врз животот“, и повторно ја нагласи потребата од континуирана меѓународна поддршка за Украина во нејзината одбрана од руската агресија.
Нападот претставува еден од најголемите координирани воздушни удари од почетокот на годината и уште еднаш ја нагласува интензивната употреба на комбинирани дронско-ракетни операции од страна на руските сили.
Подготви: Џ. Д.
