На 1500-тиот ден од целосната руска инвазија врз Украина, земјата повторно е под масовни напади со дронови и ракети, кои предизвикуваат жртви меѓу цивилното население и сериозни разурнувања на цивилната инфраструктура.
Украинската амбасадорка во Северна Македонија, Larysa Dir, во објава на социјалните мрежи предупреди дека теророт продолжува со несмален интензитет:
„Ден 1500 рф продолжува со системски терор со дронови и ракети. Од рано утро—тревога и експлозии во градови на Украина… Повредени деца, уништени животи, разурнати домови и критична инфраструктура. Средствата за ПВО и притисок врз агресорот – единствениот пат кон крај на војната.“
Ден 1500 рф продолжува со системски терор со дронови и ракети. Од рано утро—тревога и експлозии во градови на🇺🇦 Последиците—повредени деца, уништени животи, разурнати домови и критична инфраструктура. Средствата за ПВО и притисок врз агресорот-единствениот пат кон крај на војната pic.twitter.com/GWTDTQC3RK
— Larysa Dir (@dir_larysa) April 3, 2026
Нејзината порака доаѓа во услови на нов бран координирани напади низ повеќе региони, вклучително и главниот град Кијив, каде што сирените за воздушна опасност и експлозиите се дел од секојдневието.
Зеленски: Русија не покажува волја за мир
Претседателот на Украина, Володимир Зеленски, во своите последни обраќања потенцира дека интензитетот на нападите е јасен сигнал дека Москва не е подготвена да ја запре војната.
„Русија не покажува намера да ја заврши војната… Потребен е поголем притисок врз агресорот,“ порача Зеленски, додавајќи дека Украина секојдневно се соочува со стотици дронови и ракети.
Тој повторно ја нагласи клучната улога на противвоздушната одбрана, истакнувајќи дека секој нов систем за ПВО значи спасени животи.
Ескалација и таргетирање на цивили
Украинските власти предупредуваат дека нападите се насочени не само кон воени цели, туку и кон станбени објекти, енергетска инфраструктура и јавни услуги. Последиците се драматични: повредени деца, уништени домови и милиони граѓани кои живеат под постојана закана.
Според официјални украински извори, овие напади се дел од поширока стратегија за исцрпување на украинската одбрана и создавање постојан психолошки притисок врз населението.
Кијив постојано укажува дека без дополнителни системи за противвоздушна одбрана, ризикот за цивилите останува висок. Украинското раководство бара и засилен меѓународен притисок врз Русија преку санкции, дипломатска изолација и ограничување на финансиските текови што ја одржуваат војната.
По 1500 дена од почетокот на целосната инвазија, Украина останува под постојан напад, но и со јасна порака кон светот дека војната може да заврши само со запирање на агресијата, засилена одбрана и одлучен меѓународен ангажман.
Д. Мишев / Џ. Дерала
