ДПМНЕ го прослави 27-от роденден… Веќе уморниот и десеткуван агитпроп апарат на Груевски продолжува да произведува здодевни и плитки говори за него. Роденденот на партијата, среде скапо платениот лажен сјај на одвратниот кич на нивниот квази-музеј, уште еднаш го покажа трулежот на оваа структура.
Груевски не заборава да каже дека неговата партија победила на десет избори по ред, но испушти да каже за колку од тие изборни процеси се наоѓа под истрага. Ако заборавил, нека прочита во поканите за распит во СЈО (предмет: „Титаник“). Повторно ќе ја реформира партијата, што ќе рече, ќе продолжи со чистките и насилството. Сега барем не може да дивее низ целата земја, но затоа сѐ уште може да прави бељи во партијата и општините. Што не е моќ за занемарување.
Ако денеска ја замислиме партиско-фамилијарната фотографија на Груевски, ќе се сетиме на ретушираните фотографии кои одлично ги илустрираат политичките чистки на Сталин.
Има многу кандидати за реформирање на ДПМНЕ. Извесниот Александар Михајловски поведе битка со Груевски од внатре, под превезот на реформи и демократизација на партијата. Но, и тој, како и неговиот официјален партиски лидер, вели дека неговата партија е света и дека победила на повеќе избори. Ни збор за изборните кражби, структурното и политичкото насилство, за грабежот… Тоа е реформа?
ДПМНЕ е морален и политички губитник. Ќе мора да направи многу повеќе од демократизација на партиската структура за која веќе на почетокот се гледа дека е разбрана како внатрепартиска пресметка со груевизмот и ништо повеќе. Проф. Јове Кекеновски и ФРОДЕМ, една модерна и патриотска структура, нуди многу подемократски и реформаторски концепт, но се чини дека новите „внатрешни“ реформатори не се подготвени за соработка. А токму ориентирите кои Кекеновски и неговите соборци ги поставија на јавната сцена уште пред неколку години, се тоа што ѝ треба на оваа партија, но и на целата политичка сцена во Македонија.
ДПМНЕ ќе мора да се пресмета со фашизмот кој е длабоко вгнезден во нејзините пазуви и прелеан во Скопје 2014, културата и образованието, во односот на институциите кон малцинствата, жените, хомосексуалците, а особено кон оние што размислуваат со своја глава. Оваа партија негува длабоко непријателство кон индивидуата. Грабежлив и насилен чопор! Тоа е прилично веродостоен опис за оваа партија која очигледно нема капацитети да го надмине тоа. Сè уште.
Објавено во Плусинфо и Слободен печат (19.06.2017)
