Итна исплата на две плати и конечно решение за статусот на прилепскиот загубар „Еурокомпозит“, бараат околу 280 вработени во единствената фабрика за наменско производство за потребите на одбраната и безбедноста во државата. Тие втора недела протестираат, одбиваат да работат, иако во тек е реализација на потпишани договори со странски партнери.
„Одбиваме да продолжиме со работа, додека не ни исплатат барем две плати, зашто последна плата ни е исплатена за ноември 2016. Од друга страна, ни должат неисплатени плати за 2013, а придонесите за ПИОМ, не ни ги плаќаат од мај 2012 година. На нашите маки не им се гледа крајот. Нѐ испуштаат на принуден одмор со 70 отсто плата, неколку пати годишно… А, потоа кога има склучени договори, работиме турбо и по две смени дури“, реагираат вработени во „Еурокомпозит“.
Од синдикалната организација велат дека размислуваат двонеделниот штрајк да го продолжат со протест низ улиците на Прилеп.
„Бараме средба со Владини претставници, за да им ги кажеме нашите проблеми и да дојдеме до решение. ‘Еурокомпозит’ е државна фирма, менаџерите кои со години ја водат фирмата во пропаст, се секогаш по избор на Владините гарнитури, но штетата е само наша. До кога вака? Ние сме просечно на возраст преку 50 години и не можеме на друго место да бараме работа“, реагираат од Синдикатот на фабриката.
„Еурокомпозит“ е фирма ќерка на некогашниот гигант „Еуроинвест 11 Октомври“. По пропаѓањето на оваа компанија, настанаа „Еурофуд“, „Еуропрофил“, „Еуроламинати“, „Еуротрејд“, хотелот „Липа“ и други.
Сите завршија во стечај, остана само „Еурокомпозит“. Од некогашните околу 600, денеска останаа 280 вработени, коишто во безизлезот се одлучуваат за индивидуално тутунопроизводство, како единствен начин за опстанок на нивните семејства.
М. Талеска
