Неколку дена нема вода за наводнување на околу 2.000 хектари земјоделско земјиште во регионот на Богданци! АД „Водостопанство“ ги затвори вентилите од системот за наводнување од браната и не само што трпат штети индивидуалните производители, туку на езерото Паљурци му се заканува еколошка катастрофа и пресушување, доколку итно не се интервенира.
Земјоделците бараат Министерството за животна средина да интервенира со пренасочување на водата од системот за спас на Дојранското езеро – кон нивите. Тие стравуваат дека без вода ќе се исушат овошните и зеленчукови насади и дека ќе трпат огромни штети. За еколошкиот биодиверзитет на езерото Паљурци и за фауната која вирее во овие води, се загрижени и спортските риболовци. Ако се загрози еколошкиот минимум, според нив, тоа ќе значи – крај за спортскиот риболов на езерото Паљурци.
Од АД „Водостопанство“ информираат дека на 13 јуни, со допис е известено и ресорното Министерство, со најава дека пеколните горештини може да доведат до проблемот, што сега стана акутен.
„Го известивме Министерството дека доколку не се интервенира, браната ќе нема вода, поради високите температури. Целата вода од браната не смееме да ја испуштиме, а од друга страна, не смееме да ги вклучиме ниту пумпите од системот кај Ѓавато, со коишто ќе се овозможи дотур на вода во езерото, зашто тоа е надлежност на Министерството за животна средина“, велат од АД „Водостопанство“.
Од Министерството посочуваат дека АД „Водостопанство“ треба да ја извести Владата за овој проблем.
„АД Водостопанство треба да испрати информација до Владата, па потоа, Владата ќе го задолжи Министерството за животна средина и просторно планирање, да ги вклучи пумпите. Бидејќи Министерството не располага со средства коишто се потребни за плаќање на потрошената електрична енергија, со вклучување на пумпите што ќе овозможат дотек на вода во езерото Паљурци“, изјави за ЦИВИЛ Медиа, Сашо Секулоски, портпарол на Министерството за животна средина и просторно планирање.
Според најавите, денеска или утре, на седница на Владата ќе се разгледа овој проблем, за да им се излезе пресрет и на земјоделците, но и за да се спаси езерото.
М. Т.
