Со големо полициско обезбедување пред судот, додека Скопје го надлетуваа хеликоптери, денеска, во салата на Врховниот суд, Обвинителството за гонење организиран криминал и корупција ги изнесе завршните зборови за случајот „Диво Насеље“ во мај 2015, кога загинаа осум, а беа ранети над 40 полицајци.
Додека обвинителот Наум Пановски презентираше делови од обвинителниот акт, Насуф Бекири, еден од обвинетите за случајот, стана и му се обрати на Пановски со зборовите: „Сакам да излезам надвор, не можам да те слушам како зборуваш глупости и невистини!“.
Пановски побара највисоки казни за обвинетите за тероризам – доживотен затвор.
Тој образложи кој од групата обвинти за тероризам, точно каква задача имал во Куманово на 9 и 10 мај 2015 година, истакнувајќи дека дел од обвинетите биле логистичка поддршка, односно задолжени за сместување на групата, за носење на храна и за сè останато што им било потребно.
Судењето за „Дива Населба“ почна во февруари минатата година, а обвинети се 37 лица за тероризам. Во крвавиот инцидент загинаа осум полицајци: Жарко Кузмановски (32) и Сашо Самоиловски од село Брвеница (32), Ненад Серафимовски од село Зубовце (27), Исамедин Османи од село Студеничани (32), Бобан Ивановиќ од село Стајковци (47), Горан Илиевски од Гостивар (41), Љубиша Аранѓеловиќ од Скопје (49) и Горан Стојменовиќ од село Миладиновци (45), а уште 37 нивни колеги беа ранети со разна тежина на повредите. Убиени беа и десет лица од вооружената група од Косово.
Според Обвинителството, дел од обвинетите се погрижиле да обезбедат илегално преминување на напаѓачите од Косово, додека една група го обезбедила поголемиот дел од оружјето од полициската станица во Гошинце.
Обвинетите од локалното население се товарат дека доброволно ги прифатиле терористите и ги сместиле во своите куќи.
Иако се очекуваше завршен збор да даде одбраната, сепак, тоа ќе случи на наредното рочиште, бидејќи одбраната го побара на увид записникот од завршните зборови.
