Да прекине „побизнисувањето“ на извршната функција, печалењето на извршителите на сметка на граѓаните, од кои, и за мали побарувања, се наплаќаат високи трошоци при реализација на извршните решенија. Оваа е препорака на правната експертка Мирјана Најчевска, којашто во изјава за ЦИВИЛ Медиа, посочува на потребата од измени во законската регулатива во сферата на извршувањето, со цел – заштитата на правата на граѓан(к)ите да биде во преден план.
„Извршувањето, вака како што е поставено во Република Македонија, има одредени проблематични моменти. Се добива впечаток дека е извлечено надвор од она што претставува надлежност на судовите, односно, судовите стануваат надлежни за процесот на извршување, дури во моментот кога човек ќе се пожали! Потребна е некаква дополнителна активност од граѓаните за да можат да се заштитат од несоодветното извршување. Ова е спротивно и на идејата што ја застапува Европскиот суд за човекови права, за единство на судската постапка. Имено, судската постапка не завршува со донесување на конечната одлука на судот, туку со извршување на таа одлука, што подразбира надлежност на судот во следење на извршувањето на одлуката“, акцентира професорката Најчевска.
Доколку на таков начин се прилагоди регулативата, според Најчевска, судовите ќе имаат дополнително влијание, односно, дополнителна можност за надзор врз извршувањето, така што дел од несоодветните постапки за извршување – ќе бидат разрешени.
„Извршувањето и извршителството како идеја, како институт е во суштина насочено кон заштита на граѓаните, за да не бидат доведувани во ситуација да бидат донесувани судски одлуки, што натаму ќе бидат само мртва буква на хартија. Но, во последниот период, особно со начинот на некакво ‘побизнисување’ на извршната функција, односно ставање на извршителите како некој вид претпријатија што печалат од оваа функција, всушност, најзагрозени се граѓаните! Оние граѓани, коишто и за многу мали долгови, одеднаш се доведуваат во ситуација, да не можат да ги платат дополнителните трошоци, што во огромна мера го надминуваат главниот долг, со што се обесмислува целата идеја на заштита и се претвора во повреда на правата на граѓаните“, вели Најчевска.
И во анкетата што ЦИВИЛ Медиа ја реализираше минатата недела, граѓан(к)ите на Скопје, бараат промена на регулативата. Изминатава деценија стотици, илјадници граѓани од сите страни на Македонија, се жалеа на начинот на којшто се извршуваат решенијата. Некои од нив, останаа и без имот, им беа извршувани големи суми, дури и цела плата – за една неплатена сметка за радиодифузна такса, или за други комунални давачки! Гневот на граѓан(к)ите е голем, но многу пострашно е што досегашниот начин на реализација на извршните судски решенија доведува до дополнително осиромашување и обесправување на граѓаните.
Моника Талеска
