На вчерашната седница на Државната изборна комисија е усвоен и Проектот за проверка и проценка на пристапноста на избирачките места за лица со попреченост.
ДИК на седницата ги усвои и прирачниците за едукација на општинските изборни комисии и избирачките одбори, извештаите од спроведената функционална анализа во ДИК, Извештајот за институционална проценка на подрачните одделенија и канцеларии на ДИК, Предлог–правилникот за внатрешна организација и делокруг на работата на стручната служба на ДИК, како и Предлог-правилникот за систематизација на работните места во Стручната служба на ДИК.
ЦИВИЛ – Центар за слобода најави дека во текот на идната недела ќе излезе во јавноста со анализи на условите за одржување на локални избори, на Избирачкиот список и на други аспекти на овој процес.
Џабир Дерала, претседател на ЦИВИЛ на трибината „Имплементација на мерките од Планот 3-6-9 во делот на изборите“ на 28 јули, презентираше дел од препораките на организацијата, подготвени од правничката Сандра Гавриловска, членка на експертскиот тим на ЦИВИЛ, пред претставниците на ДИК и на останатите институции надлежни за спроведување на изборите.
Инаку, на вчерашната седница на ДИК е усвоен и Проектот за проверка и проценка на пристапноста на избирачките места за лица со попреченост, прв проект од ваков тип што ДИК ќе го реализира. Проектот е иницијатива на Здружението за промоција и развој на инклузивно општество „Инклузива“ од Куманово.
Во интервју за ЦИВИЛ Медиа, проектниот координатор на здружението, Елена Чекорова, потецнираше дека по 8 месеци барање средба, ДИК им одговорила позитивно, со ветување дека дел од нивното истражување „Пристапни избори“ (Мониторинг на учеството на лицата со попреченост во политичкиот и изборниот процес во Македонија), ќе биде имплементиран од Комисијата.
„Во соработка со ‘Инклузива’, на наша иницијатива, покрената од нашето истражување, ДИК организираше неколку работни состаноци на кои што се вклучија и други невладини организации. На нив дискутиравме како може да се промени ситуацијата во краткиот период пред локалните избори“, изјави Чекорова за ЦИВИЛ Медиа.
Б. Јордановска
