Специјалното јавното обвинителство (СЈО) чии обвинители досега преслушале 70 проценти од незаконски прислушуваните разговори, денеска до Собранието и до Советот на јавни обвинители на Република Македонија, го поднесе четвртиот шестмесечен извештај за работата на Обвинителството за гонење кривични дела поврзани и што произлегуваат од содржината на незаконското следење на комуникациите, што го опфаќа периодот од 15 март до 15 септември годинава.
„Поднесени се вкупно 18 обвиненија за 19 предмети против 120 лица за 168 кривични дела. Во текот на извештајниот период, отворени се вкупно 7 нови истражни постапки против вкупно 25 физички, и преземени се истражни дејствија против 4 правни лица. Поаѓајќи првенствено од целта заради која беше формирано Специјалното јавно обвинителство, резултатите од досегашната работа ја потврдуваат сериозноста во истражување и гонење на софистицирана корупција од висок профил, и како таква институција, има капацитет и треба да продолжи да работи и понатаму во Република Македонија. Довербата која преку резултатите од нашата работа успеавме да ја стекнеме, пред сè, кај граѓаните претставува уште една потврда дека СЈО, како институција етаблирана во домашниот правосуден систем, претставува важен институционален механизам“, стои во извештајот на Специјалната јавна обвинителка Катица Јанева.
Според Јанева, СЈО останува и натаму посветено и решително во остварување на целта, откривање на кривичните дела што прооизлегуваат од аферата „Прислушување“, што значи суштински чекор напред во враќање и зачувување на владеењето на правото.
„За работата на ова Јавно обвинителство е многу важно да напоменам дека Апелациониот суд Скопје, одлучувајќи по наша жалба на решение, со кое беа издвоени снимките и беше определено дека истите не може да се користат како доказ во постапката, утврди дека аудио-записите стануваат дел од доказниот материјал и може да се користат како доказ во постапката. Одлуката на Апелациониот суд е исклучително важна и е во согласност и со мислењата на голем број универзитетски професори и правни експерти, кои во свои јавни настапи и излагања, изнесоа свои ставови дека со оглед на специфичната законска надлежност на ова Јавно обвинителство, материјалите кои се поврзани и произлегуваат од содржината на незаконското следење на комуникациите, може да се користат како доказ во постапката“, стои во Извештајот.
„Покрај мојата законска обврска за доставување на овој извештај за активностите на Јавното обвинителство со кое раководам, за изминатиот шестмесечен период во кој се содржани податоци, врз основа на кои може да се цени законитото и професионално работење на ова Јавно обвинителство, цврсто сум убедена дека и овој Извештај ја покажува заложбата за транспарентност, отчетност и одговорност во работењето“, наведува обвинителката Јанева.
Според извештајот, обвинителите на СЈО, досега преслушале 70 проценти од незаконски прислушуваните разговори. Во изминатите шест месеци, потрошени се вкупно 104.414.558,00 денари (1,6 милиони евра) или 45,79% од одобрениот буџет за годинава.
