Додека трае изборната кампања, македонски претставници речиси секојдневно имаат средби со дипломатски претставници на меѓународната задница.
Претседателот на Република Македонија, Ѓорге Иванов, на 25 октомври се сретна со Доналд Туск, првиот човек на Европскиот совет. Фокусот на средбата била европската иднина на Македонија и сè она што го прави земјата, за конечно да добие датум за почетокот на преговорите. Во своето обраќање на официјалната сесија на отворањето на Форумот „Кран Монтана“, Иванов изјави дека очекува Европската унија да покаже решителност и да ѝдаде на Македонија датум за почеток на преговорите за членство. Покрај разговорот за иднината на Македонија во ЕУ, се разговарало и за состојбата во регионот и во ЕУ, како и прашањето со мигрантската криза.
На Осмата конференција на претседатели на парламенти од земјите на Западен Балкан, на покана од претседателот на унгарското национално собрание, ќе се обрати и претседателот на Собранието на Македонија, Талат Џафери. Џафери на конференцијата ќе се обрати на темата „ЕУ интеграции: резултати и аспирации“.
Заменик-претседателот на Владата задолжен за економски прашања, Кочо Анѓушев, вчера беше во работна посета на Брисел. Неговиот кабинет соопшти дека ќе има и средба со белгиската министерка Мари Кристин Маргхем, министерката за енергетика, животна средина и одржлив развој.
Претседателот на Владата на Република Македонија, Зоран Заев, вчера се сретнал со директорот за меѓународни еврејски односи во Американскиот Еврејски Комитет (АЈЦ) , рабинот Ендру Бејкер, соопштуваат од Владината прес-служба.
Премиерот Зоран Заев на средбата со косовскиот министер за надворешни работи, Беџет Пацоли, која беше одржана на 25 октомври, изјави дека Владата на Република Македонија е определена да гради добри односи со Косово, како и со сите соседи, и со тоа да придонесе кон иднината на целиот регион на Западен Балкан, во Европската унија и во НАТО. Договорено е владите на Македонија и на Косово да ги поттикнат бизнис заедниците и коморите за поцврста и поактивна соработка.
Косовскиот министер за надворешни работи Пацоли, изјавил дека Косово ги поддржува НАТО интеграциите на Македонија, кои ќе придонесат кон зацврстување на безбедноста и ќе влијаат на перспективите на целиот регион. Според него, Заев со огромна вештина и достоинство, во Македонија воспоставил едно општество за сите.
Меѓуминистерската група за надгледување на процесот на изработка на стратешките одбранбени документи, на 24 октомври имаше средба со Стивен Гловер, советник за одбрана и безбедност во Министерството за меѓународен развој на Велика Британија. Во составот на групата со која претседава министерката за одбрана, Радмила Шекеринска, се и министерот за внатрешни работи Оливер Спасовски, министерот за надворешни работи Никола Димитров, министерот за финансии Драган Тевдовски и министерот за правда, Билен Саљији.
На работниот состанок на директори за младински политики во Талин, Естонија, учествуваше и директорот на Агенцијата за млади и спорт (АСМ) Дарко Каевски. Според АСМ, Каевски ги споделил своите искуства со европските колеги за начинот на кој се одвиваат новите политики за млади во Македонија. На состанокот се одржале и повеќе работилници кои се посветени на младите во Европа, дигиталната ера, како и учеството на младите во процесот на креирање политики и одлучување.
А. П.
