Премиерот Зоран Заев синоќа најави нов закон за спречување на дискриминација, на прославата на петтиот роденден на Центарот за поддршка на ЛГБТ заедницата, која се одржа во Музејот на современа уметност во Скопје.
Тој рече дека граѓаните на овие избори застанале зад концептот дека секој е важен и дека Македонија треба да биде држава на сите граѓани.
„Еден од темелите на демократијата е почитувања на човековите права. Знам дека вашиот Центар беше изложен на поттикнати насилнички напади. Владата ќе донесе нов Закон за заштита од дискриминација според меѓународни стандарди. Ве охрабрувам да бидете гласни, слободно да се изразувате и да дејствувате во насока на заштита на правата на граѓаните“, рече премиерот Заев.
Тој даде лична донација за Сигурната куќа на Центарот за заштита на ЛГБТ заедницата, каде се згрижени лица кои биле принудени да ги напуштат своите домови поради сексуалната ориентација.
„Ова е прв роденден во слобода! Бевме напаѓани, навредувани, но за тоа никој не одговараше“, рече Уранија Пировска, извршен директор на Хелсиншкиот комитет за човекови права.
Кочо Андоновски, програмски директор на ЛГБТИ нагласи дека досега се одржани над 150 јавни настани, околу 50 луѓе добиле психо-социјална помош, а сите овие работи се правени во време на режим во кој беа напаѓани.
„Преживеавме, направивме четири кампањи на локално ниво во режим што не напаѓаше. Двапати бевме цел на напади и тоа токму на нашите родендени“, истакна Андоновски.
Изминатите години членови на ЛГБТ заедницата беа повеќе пати нападнати. На одбележувањето на двегодишнината на Центарот за поддршка, членови беа физички нападнати во кафе барот „Дамар“ во старата Скопска чаршија. Полицијата ниту еднаш во нападите не препозна дискриминаторски мотиви. Обвинителството нема процесуирано ниту еден случај.
Д.М.
