„Ликови што биле икони тонат со причина, беа херои сега ги викаат само п…ња. Никогаш нема да се врати времето што било кога летаа малку, а сега секој е свој пилот“… Оваа реченица од песната „Надвор“ на Тони Зен, деновиве ми се врти во главата гледајќи го лидерот на ВМРО-ДПМНЕ, Никола Груевски, како цела недела речиси сам протестира надвор на ладново време, пред Министерство за правда, затворот во Шутка, пред Влада… Тоа е, сега „дојде живот“, секој може да си го искаже револтот, на улица!
Некогашниот моќен водач, во кого членовите на неговата партија и неговите симпатизери (користољупци) се крстеа и му палеа свеќа како на светец, кога никој не помислуваше чешмичка да направи (сруши) без негов амин, одеднаш, речиси преку ноќ ја изгуби моќта и стана обичен смртник, (осомничен политичар) граѓанин.
Вчера додека протестираа стотината поддржувачи пред Владата скандирајќи „Никола нема оставка“ сликата беше тажна. Веројатно Груевски, да знаеше дека нема да ужива во барокната владина палата, пред (решетките) оградата што ја постави како штит, ќе направеше топлотна улица, надстрешници, ќе поставеше на секој метар по некоја греалка за да не му мрзнат патриотобраните, односно Грујобраните!
Во изминатите денови бевме сведоци дека цело време бледо ги копираат методите на демонстрантите коишто протестираа против режимот на Груевски, и не би ме зачудило во недостаток на скандирање некој вчера да извикуваше – „Ружна ви е владата“!
Говорот на Груевски беше за очекување, тажен, без емоции, ладен… Меѓутоа изненадувачки за мене (како нечиј син), е говорот на Зорица Чавкова, ќерката на приведениот, Митко Чавков. Таа имаше очаен говор, односно – читање.
(Чита) „Се гордеам со моето презиме“, (чита) Мојот татко не е терорист“ (чита од ливчето). „Не се терористи ниту неговите колеги… (го крева напишаното ливче поубаво да прочита) „Не се терористи ниту Дурловски, Дамовски, Илиевски… го знам тоа јас, го знаете тоа и вие“… (завршува со читање)!
Сериозно, зарем мора да чита дека се гордее со своето презиме и дека татко и не е терорист?! Зарем и самата не верува во тоа што го зборува, па мора да прочита да не се збуни нешто…?
Во моментов политичките случувања станаа тренд во нашата држава и граѓан(к)ите повеќе се „палат“ на апсењата, отколку на разголените фотки на Кардашијан или стомачните на Роналдо… Меѓутоа, мислам дека политичките опоненти сепак ќе мора да почекаат да згасне „брендот“ Груевски.
