На вчерашната панел дискусија „(Не) Слободни медиуми во Македонија“ која ја организираше ЦИВИЛ – Центар за слобода, Атанас Кировски, директор и главен уредник на Телевизија Телма, зборуваше за физичките напади врз новинарите и неказнивоста како еден од главните проблеми поврзани со новинарската професија.
„Она што можам да го кажам е дека во последниот период од владеењето на претходната политичка гарнитура, ние во Телма на дневна основа имавме колегиуми каде што се размислувавме дали и до кој степен е опасно да испратиме екипа да известува од настан. Павле Беловски беше брутално физички нападнат пред МВР, напад за кој за жал нема судска разрешница. На 27 април немавме можност во живо да известуваме од Собранието онака како што сакавме ни ја искршија камерата, Боби Христов одвај преживеа, новинарките бегаа до хотел Бристол за да се обратат на полицијата да ги заштити, а полицајците само дигале раменици и рекле ‘снаоѓајте се’. Година дена се поминати, а немаме ниту една судска пресуда за истепани новинари. Тоа е огромен скандал. За каков дигнитет ќе зборуваме понатаму кога за обични силеџии кои тепале новинари додека известувале, не можеш да добиеш правосилна пресуда. Од друга страна, пак, да речеме, јас и тројца други колеги сме на суд од еден човек којшто влезе на 27 април во Собрание, затоа што сме го објавиле на телевизија дека бил во Собрание, него го избркале од работа и сега нас не тужат. Како ние да сме го терале да влезе во Собрание. Тоа се тие апсурди со кои се соочуваме“ истакна Кировски.
Првата итна препорака на ЦИВИЛ произлезена од истражувањата и разговорите со медиумските претставници и претставниците на граѓанското општество, како и од анкетите со граѓанките и граѓаните во рамките на проектот „Од разбирање до одбрана“, беше токму стопирање на неказнивоста на оние што на било каков начин ја загрозуваат слободата на изразување и медиумските слободи, а со тоа и безбедноста на новинарките и новинарите.
За неказнивоста како еден од најголемите проблеми на новинарите и медиумските работници предупреди и Драган Секуловски, извршен директор на Здружението на новинари на Македонија.
„Ова е тема којашто ЗНМ ја третира со особен интерес и за жал во Македонија сè уште постои регистар на над 55 напади на новинари, од коишто само лани се случија 18. Од тие 55, ако се поделат во категории, најголем дел се физички напади на новинари, потоа уништување на нивниот имот, вербални закани, закани по животот на новинарите и по членови на нивните семејства, како и груби навреди изнесени од страна на јавни личности“, истакна Секуловски.
Маја Ивановска
