ЦИВИЛ организираше тркалезна маса на тема „Има ли слобода во Македонија?“, посветена на слободата на изразувањето и медиумските слободи.
Џабир Дерала, претседател на ЦИВИЛ -Центар за слобода, го презентираш проектот „Од разбирање до одбрана“, анализата што произлезе од истражувањата и разговорите со медиумските претставници и претставниците на граѓанското општество, како и од анкетите со граѓанките и граѓаните.
Исто така, Дерала упати и препораки за подобрување и заштита на медиумскиот простор и слободата на изразување во Македонија.
„Прва итна препорака на ЦИВИЛ е токму стопирање на неказнивоста на оние што на било каков начин ја загрозуваат слободата на изразување и медиумските слободи, а со тоа и безбедноста на новинарките и новинарите. Втората препорака е дека јавниот сервис мора конечно да се врати на јавноста. Сите што се одговорни за медиумската ерозија треба да се соочат со правни последици. Третата препорака е да се зајакне независноста на медиумското регулаторно тело, телата за медиумска саморегулација, да добијат соодветна поддршка од институциите на државата без условување и без коруптивни потези.
Четврта препорака е институциите на локално и национално ниво, како и бизнис заедниците, мора да ја почитуваат слободата на изразување и медиумските слободи соодветно на уставните, меѓународните и правните норми и стандарди. Петта препорака е законската регулатива мора да се синхронизира со потребите на медиумите и со потребите за саморегулација. Шестата препорака се однесува на финансиската независност на медиумите како услов за медиумската слобода, но слободата на изразување во целост.
Коруптивното влијание на политичките и бизнис центрите на моќ треба да се идентификуваат и да се спречат со законски мерки и макслимално почитување напрофесионалната етика. Исто така, мора да се креира овозможувачки амбиент во општеството во кое слободата на изразување,медиумските слободи и активното граѓанство ќе се третираат како ресурси на општеството и државата за демократски развој и владеење на правото… Деветтата препорака се однесува на суштинска и содржајна соработка на медиумите и граѓанското општество… Десеттата препорака е насочување на донаторската заедница кон суштинските потреби на медиумите деполитизација, професионализација и независно работење“, изјави Дерала.
Овие препораки на ЦИВИЛ, истакна Дерала, се резултат токму на учеството на шеесетина претставници на медиумите и граѓанското општество, но и на граѓанките и граѓаните кои преку анкети или неформално ги посочија своите ставови и мислења за состојбата на слобода на медиумите и на слободата на изразување во Македонија.
На тркалезната маса ЦИВИЛ ги покани соговорничките и соговорниците во проектот, чии ставови се објавени и на медиумската платформа на македонски, албански и англиски јазик.
Биљана Јордановска
Камера: Дехран Муратов
Овој проект е финансиран од Европската Унија преку програмата за мали грантови „Заштита на слободата на медиумите и слободата на изразување во Западен Балкан“ спроведена од Здружението на хрватските новинари, како дел од регионалниот проект „Регионална платформа на Западен Балкан за слобода на медиумите и безбедност на новинарите”, спроведена преку партнерство на шест регионални новинарски здруженија – Здружение на независни новинари на Србија, Здружение на новинари од Босна и Херцеговина, Здружение на новинари на Хрватска, Здружение на новинари на Косово, Здружение на новинари на Македонија и Синдикатот на медиуми на Црна Гора.
