Настаните кои го обележаа денешниот ден се однесуваат пред сè на правдата и правосудството, кое е едно од реформските приоритети на Македонија на патот кон Европската Унија и НАТО, но и надежите за напредок и просперитет на земјата.
„Утре чекаме официјална најава од седиштето на НАТО во Брисел дека на Македонија ќе и биде доделена официјална покана на следниот Самит на Алијансата во Брисел на 11 и 12 јули“, изјави денеска Националниот координатор за НАТО, Стево Пендаровски на 98. РОС-РОТ Семинар што се одржува во македонското Собрание.
Како резултат на успешната кампања и поддршката за активно учество на граѓаните, ЦИВИЛ е дел од тродневниот Состанок на заедницата за граѓанска повелба на невладини организации и активисти од целиот свет, што ќе се одржи во Аруша, Танзанија од 26 до 29 јуни. ЦИВИЛ е една од првите 50 организации потписници на Граѓанската Повелба во светот, на конференцијата Глобални перспективи во Берлин 2016 година. Организацијата е светски пионер во заложбите за промовирање на Граѓанската Повелба.
Од останатите актуелни вести, Уставниот суд го поништи рефендрумот во Дојран. Одлуката за поништување на ланскиот референдум на кој дојранчани се изјаснија против отворање на рудник во Казандол и на територијата на општината, стои во број 117 на Службениот весник на Република Македонија, од 26 јуни. Граѓаните на Дојран гласаа против отворање на рудникот Казандол, но и други рудници на територијата на општината.
Градоначалникот на општина Пласница, Исмаил Јаоски од редовите на ДУИ, преку неговата фирма „Пуцко Петрол“ добил тендер од 944 милиони денари или над 15.349.593 евра, со кој, во наредните две години ќе го снабдува со нафта ЈСП Скопје.
Судечкиот совет со кој претседава судијката Џенета Бектовиќ на денешното рочиште за случајот „Трезор“ донесе решение на обвинетиот Горан Грујевски да му се суди во отсуство, со оглед дека Врховниот суд во Атина донел одлука против екстрадиција на обвинетиот и со истата е прекинат неговиот притвор и е пуштен на слобода. Во контекст на тоа Судот го зема во предвид и известувањето од СВР Скопје дека Грујевски не е достапен на органите на прогон.
Д.Муратов
