„Саше се враќа на пролет. Договорено е.“ – тоа е пораката што вчера ја добија голем број членови на ВМРО-ДПМНЕ. Што може да значи оваа порака? Тајмингот на пораката се совпаѓа со јавниот притисок врз ВМРО-ДПМНЕ да го соопшти својот став околу референдумот. Но, пораката има и повеќе други намени. По најновата чистка во високите раководни кругови, кога се потврдија информациите дека партијата е во распад, многу е важно да се појави некоја обединувачка фигура.
Очигледно, Мицкоски не брка многу работа. Колку и да вика по ходници по своите потчинети солдати. Колку и да се труди да биде радикален (и здодевен), тој и неговиот тим за односи со јавноста не успеваат да ги сопрат последиците од поразот на режимот, раздорот и разногласието, особено непослушноста што, инаку, е невообичаена состојба за партијата.
Поткревање на партискиот морал
На Фамилијата во овој момент очајно многу им е потребна моќна фигура, некоја што влева стравопочит и која е доволно богата да ги разбуди апетитите за добивка. Никола Груевски е презафатен со парадирање на пистата пред Кривичен, изгледа уморно и истоштено од сето преслушување на снимките во предметите на СЈО против него.
За сега, батето нема толку густа агенда, па има време да се појави и во Лофт, заедно со својот ентураж и со син му, па да лумпува до ситни саати. Останува отворено прашањето дали Мијалков навистина е толку безгрижен и убеден во својата недопирливост или тоа е, сосе вчерашната порака до членството, обид за поткревање на урнисаниот партиски морал во пресрет на големите одлуки… а среде распад на системот… А можеби и реална амбиција да застане на партиското кормило…
Тоа повлекува и прашање дали со тоа се согласил неговиот братучед, Никола Груевски. Или тој одамна е шкартиран и ставен на лента што води кон Идризово?
Работата дојде дотаму што сега за моќниците во оваа партија е многу важно да го убедат своето членство дека нивниот најбогат и најмоќен член е во милоста на власта. Како поинаку, ако не дека е договорено негово враќање. Зошто напролет? Можеби овие структури се надеваат (и планираат) дека по референдумот ќе се создадат тензии, можеби и политичка криза, па дека заедно со претседателските, ќе се одржат и предвремени парламентарни избори.
Лажна фото-вест
Како поткрепа на оваа порака, дека Саше се враќа и дека тоа е договорено, стои и една прилично матна фотографија што деновиве проструи и низ социјалните медиуми. На фотографијата централна фигура е Сашо Мијалков, во свој лумперајски елемент, наводно во прегратка со Вице Заев.
Луѓе што лично го познаваат братот на премиерот, велат дека ликот до Мијалков е еден лик од Охрид. Тажно, што би рекла госпоџа Солза, кога внатрешните политкомесари мораат да го бодрат членството со лажни вести и да се тешат меѓу себе дека, ако Мијалков се гушка со брат му на премиерот, работата е наредена. Тоа е многу слаба утеха, па таман и да не е лажна вест.
Многу откритија од само една порака и лажна фото-вест. Состојбите во најголемата опозициска партија се полоши отколку што се претпоставуваше. Тоа не е добар знак, бидејќи оваа партија ѝ треба на македонската политичка сцена. Но, не ваква, туку модерна и демократска, но тоа одамна го констатиравме.
На пат кон иднината, со чист веш
Во секој случај, да се задржиме на висината на објективното размислување… Во ниеден миг не смееме да ги занемариме сѐ погласните тврдења дека носителите на функции во сегашната власт, на национално и на локално ниво, ни оддалеку не се на висина на својата задача. И порано сме слушнале за постоењето бизнис врски меѓу владејачката СДСМ и бате Саше. Тоа јавноста, разбудена во последните неколку години, нема да го испушти од вид и нема да го прости. Но, знае и дека прво треба да се обезбеди иднината – со Референдум.
„Амнестија нема да има!“ – кажа (повеќе пати) самоуверено и јасно премиерот Зоран Заев. Граѓанките и граѓаните на Република Македонија ќе го помнат тоа и ќе го држат за збор. Непобитни се сведоштвата дека Мицкоски и Каракамишева ја имале само таа точка – амнестија – на својата агенда, кога се одржуваа (неуспешните и непотребните) лидерски средби летово, а на кои тема беше иднината на Македонија. Тој филм е лош и неговата проекција мора да се прекине, за да му отстапи место на владеењето на правото и на прогресот.
На пат кон иднината се оди без валкан веш од минатото во багажот.
Објавено и во печатеното издание на „Слободен печат“, 23 август 2018 г.
Услови за користење, авторски права и заштита на приватноста
Преземање на содржините под различни услови од наведените не е дозволено, освен со писмена дозвола од ЦИВИЛ. Повредата на авторските права е забранета со закон.
