Денеска ќе се објави името на кандидатот за претседател на државата кој ќе биде подржан од СДСМ, ДУИ а најверојатно и од ДПА и Алтернатива. Претседателот на најголемата партија на власт ќе биде ставен во ситуација да избира меѓу четирите потенцијални кандидати кои имаат поддршка од различни фактори.
Како што дознава ЦИВИЛ МЕДИА од партиски извори, ДУИ инсистира на Оливер Спасовски, иако тој на сите партиски анкети е зад сите останати кандидати, Стево Пендаровски, Радмила Шекеринска и Никола Димитров.
Спасовски има поддршка и од партиските структури, но неговата кандидатура би била ризична опција, особено во првиот круг, кога се знае дека има еден единствен кандидат Албанец, Блерим Река. На СДСМ им се неопходни и гласовите на Албанците, особено во првиот круг.
Радмила Шекеринска и Никола Димитров имаат еднаква поддршка од партиското членство.
Димитров има поддршка и од некои странски амбасадори, но тој е неприфатлив за албанските гласачи, поради неговото политичко минато, поврзаноста со ВМРО-ДПМНЕ и однесувањето во времето на мировните преговори во Охрид, 2001 година. Според извештаите од тоа време, тој ги напуштил преговорите во Охрид, бидејќи не се согласил со концептот на Рамковниот договор, кој според него не се базира на граѓански, туку на етнички концепт. Според неговите изјави од тоа време, со некои решенија во Охридскиот рамковен договор може да ја поделат Македонија.
Стево Пендаровски нема голема поддршка од партиските структури на СДСМ и на него не се гледа како на партиски човек, но овој факт и односот со јавноста му дава предност кај неопределените гласачи. Во анкетите на СДСМ, тој добива најголема поддршка во споредба со сите други кандидати, вклучително и кај албанскиот електорат. По објавувањето на кандидатурата на Блерим Река, со поддршка на Алијанса и БЕСА, Пендаровски останува како речиси единствена опција што може да привлече повеќе гласачи Албанци во првиот круг.
Името на кандидатот неофицијално се дознава дека ќе се објави вечерва во 20 часот на заедничка прес конференција на Заев, Ахмети и лидерите на другите политички партии.
А. Зеќири
Услови за користење, авторски права и заштита на приватноста
