Претседателот на Собранието на Република Македонија Талат Џафери денеска во општина Пустец оствари средба со потпретседателот на општината Андон Јани, со претседателката на Советот на округот Корча, Ана Веруши и со советниците на оваа општина.
Џафери на средбата, како што јави известувачот на МИА, ја истакна потребата од проширување на прекуграничната соработка, како потенцијален ресурс за инфраструктурен, економски и туристички развој.
– Етничките заедници се мост на поврзување меѓу двете држави и тие придонесуваат кон пријателските односи помеѓу Република Македонија и Република Албанија, рече Џафери.
За време на средбата беа спомнати и позитивните напори од двете држави во насока на креирање на поволна клима за подлабока соработка во областите од клучен интерес за двете држави.
Позитивен пример, како што беше истакнато на средбата, е и неодамнешното одржување на заедничката седница помеѓу владите на двете земји, како и интензивирањето на взаемните посети на високо ниво.
На крајот на средбата, беше истакнато дека општина Пустец е дел од Преспанскиот Национален Парк, кој заедно со околниот регион се природен бисер и богатство со огромен туристички потенцијал, што треба да биде заштитен, сочуван и промовиран од трите соседни земји, односно Република Македонија, Република Албанија и Република Грција.
извор: МИА
Содржините кои ЦИВИЛ ги презема од други извори не подлежат на лиценцата Creative Commons 1.0, инаку вообичаена за содржините кои ги објавува оваа медиумска платформа. Ве молиме, консултирајте се со изворот за преземање на таквите содржини.
