Граѓанскиот активист на Шарената револуција од Прилеп, адвокатот Жарко Стеваноски, до Основното јавно обвинителство поднесе кривична пријава против директорот на Јавното претпријатие за просторни и урбанистички планови ПУП од Прилеп. Стеваноски го товари директорот Бранко Нешкоски дека сторил три кривични дела: злоупотреба на службена должност и овластување, фалсификување на службена исправа и повреда на рамноправноста на граѓаните, затоа што во мај 2016 година, лажно го информирал Советот на Општина Прилеп за протестите.
„Надвор од своите статутарни и законски овластувања, доставил писмено известување и лажно го информирал Советот на Општина Прилеп, дека штетите предизвикани од протестите на Шарената револуција по Јавното претпријатие, Одделението за паркинзи, изнесуваат 12.000 денари дневно. Подоцна, во постапка за обезбедување докази пред Основниот суд во Прилеп, се утврди дека вкупните штети за сите денови додека се одржувале протестите во форма на изгубена добивка на ова јавно претпријатие, изнесуваат 4.900 денари“, изјави Стеваноски за ЦИВИЛ Медиа.
Тој додава дека оваа информација подоцна е пласирана од локалните власти преку локалните медиуми, а нему и на учесниците од Шарената револуција конкретно им е ограничено правото да го демантираат „лажниот податок“.
Директорот на ЈП за ПУП, Нешкоски во изјава за ЦИВИЛ Медиа вели дека Стеваноски по сите активности во Шарената револуција, нема кредибилитет да поднесува некому кривични пријави.
„Како директор на јавно претпријатие, јас и законски сум одговорен пред Советот, бидејќи Општината е основач на јавното претпријатие, според тоа не гледам каде има прекршување на регулативите. Друго, при презентирање на висината на штетите, не лоцирам дека се предизвикани од протестите на Шарената револуција, туку воопшто од протестите коишто се одржуваа во тој период. И тогаш и денес, стојам на ставот дека протести не треба да се одржуваат по улиците и да го блокираат сообраќајот и доведуваат во опасност здравјето на граѓаните. Незадоволните граѓани може слободно да протестираат на плоштадите“, изјави Нешкоски.
Од Основното јавно обвинителство пак потврдија дека кривичната пријава е примена, архивирана и дека се преземаат мерки за проверка на наводите.
Стеваноски е истакнат активист на Шарената револуција. Против него, прилепската полиција поднесе неколку прекршочни пријави по ист основ, за неколку дена протести. Две финишираа со ослободителна судска пресуда.
Моника Талеска