Нетранспарентноста на институциите или понекогаш нивниот игнорантски однос кон медиумите и нивните прашања понекогаш доведува до создавање или пласирање на дезинформации или пак, до обвинување дека медиумите молчат. Овој проблем се наметна како тема на панел дискусијата на ЦИВИЛ „Дезинформациите и пропагандата ги кршат човековите права“.
„Во близина на Рамстор се градат нови згради. Се вети дека таму ќе има подземен пат, нов кружен тек. Постои ризик дека таму ќе стане уште потесно сообраќајно грло отколку што е сега. Ние ги праќаме прашањата до град Скопје, до каде е проектот, бидејќи градоначалничката го имаше како тоа како едно од петте клучни решенија во нејзината програма. Прашуваме до каде е, бидејќи на терен, искрено не гледаме ништо. Одговор нема. Сега останува ние да шпекулираме. После тоа имаме ризик дека може да не демантираат. И на крајот излегува дека ние молчиме. Како новинари, сите се соочуваме со такви проблеми. Значи нетранспарентноста создава дезинформации“, изјави главната уредничка на Градска.мк, Соња Таневска.
Новинарот Дехран Муратов, констатираше дека институциите треба да намалат со бирократијата и да го скратат процесот на одговарање на новинарски прашања, односно да бидат поажурни.
„Оние бирократски термини што ги имаат, треба да испратиш мејл, па да добиеш одговор за ден, два, а веста, дезинформацијата или шпекулацијата во меѓувреме се шири меѓу луѓето. По три дена кога ќе ти стигне демантот, што се демантира, таа вест веќе е стара. Најверојатно, нивните пи-ар служби би можеле да бидат поажурни и веднаш да одговараат на прашањата и повиците. Одговорите треба да бидат брзи, навремени, за да се избориме со дезинформациите“, вели Муратов.
Б. Јордановска
камера и монтажа: Ариан Мехмети